titliyan

vo saare lamhe yahīñ kahīñ the

mirī mohabbat kī qurbatoñ meñ bahut hasīñ the

magar vo lamhe to titliyāñ the

bahut hī rangīn kahkashā.eñ talāshte the

jab in paroñ par javān rañgoñ ke aks nikhre

to uḌ chale haiñ

bahut hī anjān rāstoñ par

nikal ga.e haiñ

maiñ ḳhālī hāthoñ ko dekhtī huuñ

bahut hī hairat se sochtī huuñ

ki un meñ qaus-e-quzah kabhī thī

hazār rangoñ kī ''an-kahī'' thī

vo saare lamhe to titliyāñ the

jo uḌ ga.iiñ haiñ

na.e jazīroñ kī chāhatoñ meñ

nikal ga.iiñ haiñ

mirī duā.eñ imaam zāmin ke saath tum se

bañdhī raheñgī

hamesha sāya-fagan raheñgī

vo saare lamhe jo titliyāñ the

hazār rangoñ kī chhab dikhā kar

bahār-mausam kī chāhatoñ meñ nikal ga.ī haiñ

sukūñ kī vaadī utar ga.iiñ haiñ

wo sare lamhe yahin kahin the

meri mohabbat ki qurbaton mein bahut hasin the

magar wo lamhe to titliyan the

bahut hi rangin kahkashaen talashte the

jab in paron par jawan rangon ke aks nikhre

to uD chale hain

bahut hi anjaan raston par

nikal gae hain

main KHali hathon ko dekhti hun

bahut hi hairat se sochti hun

ki un mein qaus-e-quzah kabhi thi

hazar rangon ki an-kahi thi

wo sare lamhe to titliyan the

jo uD gain hain

nae jaziron ki chahaton mein

nikal gain hain

meri duaen imam zamin ke sath tum se

bandhi rahengi

hamesha saya-fagan rahengi

wo sare lamhe jo titliyan the

hazar rangon ki chhab dikha kar

bahaar-mausam ki chahaton mein nikal gai hain

sukun ki wadi utar gain hain