to phir ye dekha

to phir ye dekhā ki raushnī ke hisār meñ ek dev-qāmat shajar khaḌā hai

ki jis ne shānoñ pe be-shumār shāḳheñ uThā rakhī haiñ

ki be-shumār shāḳhoñ pe an-ginat koñpleñ khaḌī haiñ

jo apnī āñkhoñ kī narmiyoñ se numū kā e.ajāz dekhtī haiñ

aur apnī zinda samā.atoñ meñ

lahū kī āvāz sun rahī haiñ

to phir ye dekhā

na koī koñpal na vo shajar hai

bas ek maiñ huuñ ki be-numū huuñ

aur ik azal huuñ

bas ek maiñ huuñ ki be-niyābat huuñ

aur abad huuñ

bas ek maiñ huuñ

ki zard miTTī meñ pinḌliyoñ tak dhañsā huā huuñ

to phir ye dekha ki raushni ke hisar mein ek dew-qamat shajar khaDa hai

ki jis ne shanon pe be-shumar shaKHen uTha rakhi hain

ki be-shumar shaKHon pe an-ginat konplen khaDi hain

jo apni aankhon ki narmiyon se numu ka eajaz dekhti hain

aur apni zinda samaaton mein

lahu ki aawaz sun rahi hain

to phir ye dekha

na koi konpal na wo shajar hai

bas ek main hun ki be-numu hun

aur ek azal hun

bas ek main hun ki be-niyabat hun

aur abad hun

bas ek main hun

ki zard miTTi mein pinDliyon tak dhansa hua hun