salgirah

dam-e-umr-e-ravāñ kā dā.era

ruktā hai ik lamhe pe shāyad har baras

vo merī paidā.ish kī saa.at hai

tumhārī yā hamāre nanhe bachchoñ kī

hamāre rishta-e-indrāj meñ

yā sho.ala-e-gul se

munavvar ġhair-rasmī ajnabī vābastagī kī

jo rag-o-pai meñ musalsal ho ga.ī

maiñ roktā huuñ bevafā lamhe ko

paiham sīñchtā huuñ ḳhuun se is ko

darīda uñgliyoñ se

kaaT kar us ko khilātā huuñ maiñ dil kā ḳhosha-e-nāzuk

magar ye tā.ir-e-rānā

pareshāñ fāsloñ ke nuur kā rasiyā

zamīnoñ āsmānoñ aur ḳhalāoñ

se bhī shāyad māvarā hai

muḳhtasar se jashn par hañstā huā

har sarhad-e-imkāñ se merī tīrgī se

duur jaatā hai

falak kī raushnī kī

vādiyoñ meñ

muntazir hai

koī an-jānā anokhā ḳhūbsūrat ajnabī us kā

dam-e-umr-e-rawan ka daera

rukta hai ek lamhe pe shayad har baras

wo meri paidaish ki saat hai

tumhaari ya hamare nanhe bachchon ki

hamare rishta-e-indraj mein

ya shoala-e-gul se

munawwar ghair-rasmi ajnabi wabastagi ki

jo rag-o-pai mein musalsal ho gai

main rokta hun bewafa lamhe ko

paiham sinchta hun KHun se is ko

darida ungliyon se

kaT kar us ko khilata hun main dil ka KHosha-e-nazuk

magar ye tair-e-rana

pareshan faslon ke nur ka rasiya

zaminon aasmanon aur KHalaon

se bhi shayad mawara hai

muKHtasar se jashn par hansta hua

har sarhad-e-imkan se meri tirgi se

dur jata hai

falak ki raushni ki

wadiyon mein

muntazir hai

koi an-jaana anokha KHubsurat ajnabi us ka