glass landscape

abhī sardī poroñ kī pahchān ke mausam meñ hai

is se pahle ki barf mere darvāze ke aage dīvār ban jaa.e

tum qahve kī pyālī se uThtī mahaktī bhaap kī tarah

merī pahchān kar lo

maiñ abhī tak sabz huuñ

muñh-band ilā.ichī kī tarah

maiñ ne aaj tumhārī yaad ke kabūtar ko

apne zehn ke kābuk se āzād kiyā

to mujhe andar kī patāvar dikhā.ī dī

chāñd puurā hone se pahle tum ne mujhe chhuā

aur baat puurī hone se pahle

tum ne baat ḳhatm kar dī

jānkārī ke bhī kitne dukh hote haiñ

bin kahe hī talḳh baat samajh meñ aa jaatī hai

achchhī baat ko dohrāne kī sa.ī

aur burī baat ko bhulāne kī jidd-o-johd meñ

zindagī biit jaatī hai

barf kī dīvār meñ

ab ke maiñ bhī chunvā dī jā.ūñgī

ki mujhe aag se kheltā dekh kar

dānish-mandoñ ne yahī faisla kiyā hai

maiñ tumhāre paas leTī huī bhī

phuljaḌī kī tarah sulagtī rahtī huuñ

maiñ tum se duur huuñ

tab bhī tum merī lapToñ se sulagte aur jhulaste rahte ho

samundar sirf chāñd kā kahā māntā hai

sar-e-shām jab sūraj aur merī āñkheñ surḳh hoñ

to maiñ chāñd ke bulāve pe samundar kā ḳharosh dekhne chalī jaatī huuñ

aur mere pairoñ ke nīche se ret nikal kar

mujhe be-zamīn kar detī hai

pair be-zamīn

aur sar be-āsmān

phāñsī par laTke shaḳhs kī tarah ho ke bhī

yahī samajhtī ho

ki muñh-band ilā.ichī kī tarah abhī tak sabz ho

abhi sardi poron ki pahchan ke mausam mein hai

is se pahle ki barf mere darwaze ke aage diwar ban jae

tum qahwe ki pyali se uThti mahakti bhap ki tarah

meri pahchan kar lo

main abhi tak sabz hun

munh-band ilaichi ki tarah

main ne aaj tumhaari yaad ke kabutar ko

apne zehn ke kabuk se aazad kiya

to mujhe andar ki patawar dikhai di

chand pura hone se pahle tum ne mujhe chhua

aur baat puri hone se pahle

tum ne baat KHatm kar di

jaankari ke bhi kitne dukh hote hain

bin kahe hi talKH baat samajh mein aa jati hai

achchhi baat ko dohrane ki sai

aur buri baat ko bhulane ki jidd-o-johd mein

zindagi bit jati hai

barf ki diwar mein

ab ke main bhi chunwa di jaungi

ki mujhe aag se khelta dekh kar

danish-mandon ne yahi faisla kiya hai

main tumhaare pas leTi hui bhi

phuljaDi ki tarah sulagti rahti hun

main tum se dur hun

tab bhi tum meri lapTon se sulagte aur jhulaste rahte ho

samundar sirf chand ka kaha manta hai

sar-e-sham jab suraj aur meri aankhen surKH hon

to main chand ke bulawe pe samundar ka KHarosh dekhne chali jati hun

aur mere pairon ke niche se ret nikal kar

mujhe be-zamin kar deti hai

pair be-zamin

aur sar be-asman

phansi par laTke shaKHs ki tarah ho ke bhi

yahi samajhti ho

ki munh-band ilaichi ki tarah abhi tak sabz ho