tum jo aate ho

din nikalte haiñ bikhar jaate haiñ

shahr baste haiñ ujaḌ jaate haiñ

dastakeñ āhanī darvāze par

sar ko Takrā ke palaT jaatī haiñ

gumbad-e-ḳhāmushī girtā hī nahīñ

chaltī rahtī hai havā

khetoñ meñ dālānoñ meñ

aur apne hī talātum meñ utar jaatī hai

har taraf phuul bikhar jaate haiñ

dil kī miTTī pe koī rañg utartā hī nahīñ

aañkh nazzāra-e-mauhūm se haTtī hī nahīñ

zehn us hajla-e-tārīkī-o-tanhā.ī meñ

apne kāñToñ pe paḌā rahtā hai

vaqt aatā hai guzar jaatā hai

tum jo aate ho to tartīb ulaT jaatī hai

dhuñd jaise kahīñ chhaT jaatī hai

naram poroñ se koī haule se

dil kī dīvār girā detā hai

ek khiḌkī kahīñ khul jaatī hai

aañkh ik jalva-e-sad-rang se bhar jaatī hai

koī āvāz bulātī hai hameñ

tum jo aate ho

to is habs dukhan ke ghar se

ranj-e-ā.inda-o-rafta kī thakāvaT se

nikal lete haiñ

tum se milte haiñ

to duniyā se bhī mil lete haiñ

din nikalte hain bikhar jate hain

shahr baste hain ujaD jate hain

dastaken aahani darwaze par

sar ko Takra ke palaT jati hain

gumbad-e-KHamushi girta hi nahin

chalti rahti hai hawa

kheton mein dalanon mein

aur apne hi talatum mein utar jati hai

har taraf phul bikhar jate hain

dil ki miTTi pe koi rang utarta hi nahin

aankh nazzara-e-mauhum se haTti hi nahin

zehn us hajla-e-tariki-o-tanhai mein

apne kanTon pe paDa rahta hai

waqt aata hai guzar jata hai

tum jo aate ho to tartib ulaT jati hai

dhund jaise kahin chhaT jati hai

naram poron se koi haule se

dil ki diwar gira deta hai

ek khiDki kahin khul jati hai

aankh ek jalwa-e-sad-rang se bhar jati hai

koi aawaz bulati hai hamein

tum jo aate ho

to is habs dukhan ke ghar se

ranj-e-ainda-o-rafta ki thakawaT se

nikal lete hain

tum se milte hain

to duniya se bhi mil lete hain