tum KHuda nahin ho

nahīñ

ab mujhe sadā na do

ki shaam Dhalne lagī hai

abhī kuchh der meñ sabhī rāste gum ho jā.eñge

mujh meñ vahī shaḳhs bolegā

shaam se maiñ bujhā-bujhā sā rahtā huuñ

tumheñ kyā kahūñ

tum kisī hasīn ḳhvāb ke paroñ par savār

be-nām samtoñ meñ

ḳhud ko paane ke liye chale jāoge

maiñ akelā hī sahī

aur suno

kisī be-nām samt meñ

koī mile to itnā hī kaho

ki maiñ sadiyoñ se āb-e-hayāt ke ek jur.e kī burrish

hulqūm meñ utāre tumhārā muntazir huuñ

aur ye bhī suno

kahīñ rāste meñ

raat mil jaa.e to us se kaho

ki maiñ añdherā nahīñ huuñ

maiñ baras-hā-baras se

chāñdnī ko paane ke liye

dhuup kī baag ko thāme hue

kāñch ke TukḌoñ kā sufūf chabāne lagā huuñ

jab mere saare havās

fazāoñ meñ tahlīl ho jaa.eñ

to tum mere jism meñ

bas ek hī baar suur phūñko

aur phir

tum mujh se kaho ki ab bhī tum ḳhudā nahīñ ho

nahin

ab mujhe sada na do

ki sham Dhalne lagi hai

abhi kuchh der mein sabhi raste gum ho jaenge

mujh mein wahi shaKHs bolega

sham se main bujha-bujha sa rahta hun

tumhein kya kahun

tum kisi hasin KHwab ke paron par sawar

be-nam samton mein

KHud ko pane ke liye chale jaoge

main akela hi sahi

aur suno

kisi be-nam samt mein

koi mile to itna hi kaho

ki main sadiyon se aab-e-hayat ke ek jure ki burrish

hulqum mein utare tumhaara muntazir hun

aur ye bhi suno

kahin raste mein

raat mil jae to us se kaho

ki main andhera nahin hun

main baras-ha-baras se

chandni ko pane ke liye

dhup ki bag ko thame hue

kanch ke TukDon ka sufuf chabane laga hun

jab mere sare hawas

fazaon mein tahlil ho jaen

to tum mere jism mein

bas ek hi bar sur phunko

aur phir

tum mujh se kaho ki ab bhi tum KHuda nahin ho