tumhaare baad kya hua

tumhāre baa'd kyā huā

tumheñ to kuchh ḳhabar nahīñ

ġhamoñ ne zindagī ke saare zāviye badal diye

mirī tamām ḳhvāhishoñ ke hausle kuchal diye

mirī to saarī 'umr hī isī meñ kaT ke rah ga.ī

udāsiyoñ kī bhiiḌ meñ

safar kī tez dhuup meñ

ḳhushī kī koī bazm ho ki ġham kā silsila kahīñ

maiñ har jagah tumheñ faqat tumheñ talāshtā rahā

magar na jaane kyā huā

maiñ thak gayā

maiñ thak gayā tumhāre naqsh-e-pā talāshte hue

maiñ thak gayā huuñ is badan meñ jaan Dālte hue

ye sochtā huuñ

zindagī ke bojh ko maiñ ab nahīñ uThā.ūñgā

bhale tumheñ ḳhabar na ho

maiñ tum ko bhuul jā.uñgā

tumhaare ba'd kya hua

tumhein to kuchh KHabar nahin

ghamon ne zindagi ke sare zawiye badal diye

meri tamam KHwahishon ke hausle kuchal diye

meri to sari 'umr hi isi mein kaT ke rah gai

udasiyon ki bhiD mein

safar ki tez dhup mein

KHushi ki koi bazm ho ki gham ka silsila kahin

main har jagah tumhein faqat tumhein talashta raha

magar na jaane kya hua

main thak gaya

main thak gaya tumhaare naqsh-e-pa talashte hue

main thak gaya hun is badan mein jaan Dalte hue

ye sochta hun

zindagi ke bojh ko main ab nahin uThaunga

bhale tumhein KHabar na ho

main tum ko bhul jaunga