tumhaari shaera pagal

tumhārī shā.era pāgal

hazāroñ sher likhtī

nazm aur ġhazleñ kahā kartī

hamesha sochtī rahtī

koī kāġhaz kā TukḌā DhūñDhtī aur dil kā saarā haal likh detī

ki us ke paas to kitne hī lafzoñ kā zaḳhīra thā

siyāhī suukh jaatī jab qalam ḳhāmosh ho jaate

to phir aañsū syāhī bante jaate lafz kab ḳhāmosh hote the

tumhārī shā.era pāgal

hazāroñ lafz le kar jab

tumhāre sāmne aatī

tumheñ jab ik nazar taktī

to us ke lafz saare harf jumle sher nazmeñ aur vo ġhazleñ

tumhārī kattha.ī āñkhoñ meñ kho jātīñ

anokhī chup sī lag jaatī

tumhārī shā.era ḳhāmosh vāpas lauT jaatī thī

na aañsū bolte na lafz us kā saath dete the

tumhārī shā.era pāgal

kisī sakte meñ rahtī der tak

tā-der chup rahtī

jūñhī bistar pe jaatī

ashk bārish ban ke bah jaate

vo saare lafz lauT aate

vo aañsū chuntī rahtī aur

vo shab bhar karvaTeñ aur silvaTeñ gintī

sub.h tak sochtī rahtī

fajar tak lafz buntī harf chuntī aur phir se jab

tumhāre sāmne aatī

tumheñ jab ik nazar taktī

to us ke lafz saare harf jumle sher nazmeñ aur vo ġhazleñ

tumhārī kattha.ī āñkhoñ meñ kho jātīñ

anokhī chup sī lag jaatī

anokhī chup

qadam bojhal vo le kar lauT aatī thī

yūñhī har saal hotā thā

tumhārī shā.era pāgal

tumheñ taktī to us ke lafz hī ḳhāmosh ho jaate

kabhī fursat mile tum ko to us kī nazm paḌh lenā

tumhārī shā.era pāgal

tumhaari shaera pagal

hazaron sher likhti

nazm aur ghazlen kaha karti

hamesha sochti rahti

koi kaghaz ka TukDa DhunDhti aur dil ka sara haal likh deti

ki us ke pas to kitne hi lafzon ka zaKHira tha

siyahi sukh jati jab qalam KHamosh ho jate

to phir aansu syahi bante jate lafz kab KHamosh hote the

tumhaari shaera pagal

hazaron lafz le kar jab

tumhaare samne aati

tumhein jab ek nazar takti

to us ke lafz sare harf jumle sher nazmen aur wo ghazlen

tumhaari katthai aankhon mein kho jatin

anokhi chup si lag jati

tumhaari shaera KHamosh wapas lauT jati thi

na aansu bolte na lafz us ka sath dete the

tumhaari shaera pagal

kisi sakte mein rahti der tak

ta-der chup rahti

junhi bistar pe jati

ashk barish ban ke bah jate

wo sare lafz lauT aate

wo aansu chunti rahti aur

wo shab bhar karwaTen aur silwaTen ginti

subh tak sochti rahti

fajar tak lafz bunti harf chunti aur phir se jab

tumhaare samne aati

tumhein jab ek nazar takti

to us ke lafz sare harf jumle sher nazmen aur wo ghazlen

tumhaari katthai aankhon mein kho jatin

anokhi chup si lag jati

anokhi chup

qadam bojhal wo le kar lauT aati thi

yunhi har sal hota tha

tumhaari shaera pagal

tumhein takti to us ke lafz hi KHamosh ho jate

kabhi fursat mile tum ko to us ki nazm paDh lena

tumhaari shaera pagal