TuTam TuT gaya

kitnī āsānī se us ne rakh diyā

roTī kā pahiyā

vaqt ke chakkar ke bilkul sāmne

golā.iyoñ ke darmiyāñ phir ek TukḌā

taaḌ ke lambe tane kā

jis ne apne biij se bāhar nikalne kī sazā meñ

ek hī nuqte pe daa.im ghūmne

aur rath ke nīche aa ke kuchle jaane vaalī boTiyoñ kī

masḳh lāshoñ se guzarne ko muqaddar kar liyā

vo to aise mashġhaloñ meñ mast hai

jis samt chāhe jaa.e ghūme yā na.ī samteñ banā.e

merī kachchī shash-darī kuTiyā ke bāhar

ik khulā maidān hai

maidān jis ke ik sire se dūsre ko dekhne kī dūr-bīñ bhī

sirf us ke khel kā sāmān hai

khel garche khel kī had tak bahut achchhā lagā

maiñ ne bhī dekhā

to apnī tāliyoñ kā taḌtaḌātā giit us kī ok meñ Daalā

ḳhushī se bhar diyā jholī ko us kī

aañkh se umDe samundar āsmānoñ se gale milne lage

pyaas lekin bujh nahīñ paa.ī kisī bhī taur us kī

ḳhud-numā.ī kī satā.ish meñ taḌaptī zindagī daa.im rahegī

haañ magar ik umr kachchī bhurbhurī aadam kī miTTī se banī

khel kī ik umr hotī hai

jahāñ saare khilaune TuuT jaate haiñ chhanak se ek din

saañs roke sansanātī ḳhālī rah jaatī haiñ galiyāñ vaqt kī

suunī kalā.ī kī tarah

jis par kabhī shīshe kī rañgīñ chūḌiyāñ aTkheliyāñ khelī na hoñ

lāDle kanchoñ sī umreñ

tāliyoñ kī phūl-jhaḌiyoñ meñ bikhar kar TūTtī haiñ

aur us ke āsmānī manzaroñ kī ik dulhan

dekhte hī dekhte charḳhā sajā kar baiTh jaatī hai

dukhoñ kī barf jaisī ruuī kā

aao apne ḳhvāb ke resham se bāhar

charḳh-e-nīlī-fām ke TukḌe chuneñ

kitni aasani se us ne rakh diya

roTi ka pahiya

waqt ke chakkar ke bilkul samne

golaiyon ke darmiyan phir ek TukDa

taD ke lambe tane ka

jis ne apne bij se bahar nikalne ki saza mein

ek hi nuqte pe daim ghumne

aur rath ke niche aa ke kuchle jaane wali boTiyon ki

masKH lashon se guzarne ko muqaddar kar liya

wo to aise mashghalon mein mast hai

jis samt chahe jae ghume ya nai samten banae

meri kachchi shash-dari kuTiya ke bahar

ek khula maidan hai

maidan jis ke ek sire se dusre ko dekhne ki dur-bin bhi

sirf us ke khel ka saman hai

khel garche khel ki had tak bahut achchha laga

main ne bhi dekha

to apni taliyon ka taDtaData git us ki ok mein Dala

KHushi se bhar diya jholi ko us ki

aankh se umDe samundar aasmanon se gale milne lage

pyas lekin bujh nahin pai kisi bhi taur us ki

KHud-numai ki sataish mein taDapti zindagi daim rahegi

han magar ek umr kachchi bhurbhuri aadam ki miTTi se bani

khel ki ek umr hoti hai

jahan sare khilaune TuT jate hain chhanak se ek din

sans roke sansanati KHali rah jati hain galiyan waqt ki

suni kalai ki tarah

jis par kabhi shishe ki rangin chuDiyan aTkheliyan kheli na hon

laDle kanchon si umren

taliyon ki phul-jhaDiyon mein bikhar kar TuTti hain

aur us ke aasmani manzaron ki ek dulhan

dekhte hi dekhte charKHa saja kar baiTh jati hai

dukhon ki barf jaisi rui ka

aao apne KHwab ke resham se bahar

charKH-e-nili-fam ke TukDe chunen