ufaq zamir ki tarikiyon se aaluda

ufuq zamīr kī tārīkiyoñ se ālūda

dil-o-nazar meñ vahī intiqām ke sho.ale

kahīñ pe ḳhuun kahīñ par hai ābrū-rezī

jahālatoñ ke samundar meñ Dūbte insāñ

uThā.e dosh pe ik munsifī ke lāshe ko

phire hai shahr meñ insāniyat kā saarā vajūd

na koī daad na fariyād sunñe vaalā hai

hamāre dard ko rāhat se bharne vaalā hai

chalo ki duur chaleñ shahr kī fasīloñ se

yahāñ to maut kī har roz vārdāteñ haiñ

yahāñ to ḳhuun ke charche haiñ aur kuchh bhī nahīñ

kahīñ to amn aur insāf kī zamīñ hogī

jahāñ pe ḳhauf kā saaya na koī Dar hogā

chalo ki aisī zamīñ kī kahīñ talāsh kareñ

chalo ki duur chaleñ shahr kī fasīloñ se

ufuq zamir ki tarikiyon se aaluda

dil-o-nazar mein wahi intiqam ke shoale

kahin pe KHun kahin par hai aabru-rezi

jahaalaton ke samundar mein Dubte insan

uThae dosh pe ek munsifi ke lashe ko

phire hai shahr mein insaniyat ka sara wajud

na koi dad na fariyaad sunne wala hai

hamare dard ko rahat se bharne wala hai

chalo ki dur chalen shahr ki fasilon se

yahan to maut ki har roz wardaten hain

yahan to KHun ke charche hain aur kuchh bhi nahin

kahin to amn aur insaf ki zamin hogi

jahan pe KHauf ka saya na koi Dar hoga

chalo ki aisi zamin ki kahin talash karen

chalo ki dur chalen shahr ki fasilon se