ujDa sa jazira

zaḳhm jaise ki zabāñ rakhte haiñ

raat bhar haal sunāte haiñ mujhe

jāgte rahte haiñ saare

mire kamre ke charāġh

dard merā bāñTte haiñ

yak-ba-yak dil meñ utar aatā hai

koī ujḌā sā jazīra aur phir

siskiyāñ shor machātī haiñ havāoñ kī tarah

aur baḌhtī hai tirī yaad kī shiddat mujh meñ

ġham kā idrāk mire hosh bhulā detā hai

kuchh bagūle mire āñgan meñ bikhar jaate haiñ

maiñ unheñ dekhūñ to āñkhoñ meñ simaT aate haiñ

niiñd palkoñ se ulajhtī hai chalī jaatī hai

aur chupke se phir āñkhoñ meñ namī aatī hai

itnā phailā huā sahrā hai ġhamoñ kā mujh meñ

koī qatra koī dariyā koī qulzum bhī jise

kabhī sairāb nahīñ kar saktā

koī chāhe bhī agar

mere sunsān shabistān ko ābād nahīñ kar saktā

zaKHm jaise ki zaban rakhte hain

raat bhar haal sunate hain mujhe

jagte rahte hain sare

mere kamre ke charagh

dard mera banTte hain

yak-ba-yak dil mein utar aata hai

koi ujDa sa jazira aur phir

siskiyan shor machati hain hawaon ki tarah

aur baDhti hai teri yaad ki shiddat mujh mein

gham ka idrak mere hosh bhula deta hai

kuchh bagule mere aangan mein bikhar jate hain

main unhen dekhun to aankhon mein simaT aate hain

nind palkon se ulajhti hai chali jati hai

aur chupke se phir aankhon mein nami aati hai

itna phaila hua sahra hai ghamon ka mujh mein

koi qatra koi dariya koi qulzum bhi jise

kabhi sairab nahin kar sakta

koi chahe bhi agar

mere sunsan shabistan ko aabaad nahin kar sakta