uljhan

chāñd kī nazr kiye maiñ ne nazar ke sajde

husn-e-ma.asūm ke jalvoñ kā parastār rahā

maiñ ne tāroñ pe nigāhoñ kī kamandeñ pheñkīñ

ek rañgīn haqīqat kā talabgār rahā

zehn ke parde pe raqsāñ hai koī aks-e-jamīl

husn ke ruup meñ shāyad vo yakāyak mil jaa.e

har na.e jalve se be-sāḳhta yuuñ lipTā huuñ

jaise bichhḌā huā ik dost yakāyak mil jaa.e

maiñ ne alfāz meñ rūmān ke naġhme Dhāle

sa.ī-e-taḳhlīq-e-tarannum se sukūñ mil na sakā

mutma.in ho na sakīñ merī sulagtī nazreñ

hasb-e-dil-ḳhvāh mujhe zauq-e-junūñ mil na sakā

merī āshufta-nigāhī kā asar chhin jaa.e

mujh se ai kaash mirā zauq-e-nazar chhin jaa.e

chand ki nazr kiye main ne nazar ke sajde

husn-e-masum ke jalwon ka parastar raha

main ne taron pe nigahon ki kamanden phenkin

ek rangin haqiqat ka talabgar raha

zehn ke parde pe raqsan hai koi aks-e-jamil

husn ke rup mein shayad wo yakayak mil jae

har nae jalwe se be-saKHta yun lipTa hun

jaise bichhDa hua ek dost yakayak mil jae

main ne alfaz mein ruman ke naghme Dhaale

sai-e-taKHliq-e-tarannum se sukun mil na saka

mutmain ho na sakin meri sulagti nazren

hasb-e-dil-KHwah mujhe zauq-e-junun mil na saka

meri aashufta-nigahi ka asar chhin jae

mujh se ai kash mera zauq-e-nazar chhin jae