ummid

ummīdeñ dukh detī haiñ

kyoñ ki ummīdoñ kī chhenī se

hī toḌnā paḌtā hai apne maazī ke but ko

aage baḌhne ke liye

apnoñ ke baġhair jiine kī ummīd kī bāteñ bhī

dukh detī haiñ

aisī koī nasīhat bhuul se bhī mat denā

ummīd vo rassī hai

jis se insān añdhere meñ Tañgā huā hai

ye taklīf-dah hai

lekin is rassī kā kaT jaanā

andherī khaa.ī meñ girne jaisā hai

ummīd karnā mustaqbil kā chehra banāne jaisā hai

mustaqbil ko jānñā insān ke bas kā nahīñ

ummīd karnā apne liye ek haul-nāk qaid tayyār karne jaisā hai

ummīd phūloñ ko bahār se nahīñ hotī

bas phuul khil jaate haiñ sāvan ke aane par

sāvan kī fitrat hai bārish aur ThanDak laanā

ummīd karne se sāvan kī fitrat badal nahīñ saktī

tum apne se milne vaale logoñ se koī

ummīd mat rakhnā

bas un kī fitrat jaan lenā

ummīd ek sarāb hai

insān kā vajūd ek sahrā

aur pyaas hameñ chalā.e jā rahī hai

ummīd ke sarāb kī jhiil kī taraf

safar jaarī hai

ummiden dukh deti hain

kyon ki ummidon ki chheni se

hi toDna paDta hai apne mazi ke but ko

aage baDhne ke liye

apnon ke baghair jine ki ummid ki baaten bhi

dukh deti hain

aisi koi nasihat bhul se bhi mat dena

ummid wo rassi hai

jis se insan andhere mein Tanga hua hai

ye taklif-dah hai

lekin is rassi ka kaT jaana

andheri khai mein girne jaisa hai

ummid karna mustaqbil ka chehra banane jaisa hai

mustaqbil ko jaanna insan ke bas ka nahin

ummid karna apne liye ek haul-nak qaid tayyar karne jaisa hai

ummid phulon ko bahaar se nahin hoti

bas phul khil jate hain sawan ke aane par

sawan ki fitrat hai barish aur ThanDak lana

ummid karne se sawan ki fitrat badal nahin sakti

tum apne se milne wale logon se koi

ummid mat rakhna

bas un ki fitrat jaan lena

ummid ek sarab hai

insan ka wajud ek sahra

aur pyas hamein chalae ja rahi hai

ummid ke sarab ki jhil ki taraf

safar jari hai