ummid

vo bachcha rāj-dulārā hai jo maañ kī aañkh kā taarā hai

qudrat ne us ko nikhārā hai fitrat ne us ko sañvārā hai

vo god meñ pal kar baḌhtā hai yā ik sāñche meñ Dhaltā hai

kis pyaar se maañ ko taktā hai jab ghuTnoñ ke bal chaltā hai

hai baap kā dil us par sadqe sau jaan se maañ us par vaarī

rah-rah ke ye aas lagāte haiñ kab maktab kī ho tayyārī

ummīd hai ye ghar vāloñ ko jis dam ye javāñ ho jā.egā

kumbe meñ izzat pā.egā har bigḌī ko ye banā.egā

vo bekas qābil-e-ibrat hai jo ranj uThā.e ġhurbat meñ

ho pīchhe qāfile vāloñ se aur bhaTke raah musībat meñ

raftār batātī hai us kī ummīd se taskīñ pā.egā

vo shaam ke hote manzil par gir paḌ ke pahuñch hī jā.egā

gumrāh na hoñ bhūle-bhaTke ummīd shuā-e-māh bane

himmat se kāñTā phuul bane har zarra charāġh-e-rāh bane

ummīd se haiñ zinda armāñ ummīd se duniyā qaa.em hai

ummīd kī rangā-rangī se gulshan kā sarāpā qaa.em hai

ummīd hai aisī phulvārī jis meñ na guzar ho sarsar kā

ummīd hai ik aisā dariyā jis meñ hai ḳhazāna gauhar kā

wo bachcha raj-dulara hai jo man ki aankh ka tara hai

qudrat ne us ko nikhaara hai fitrat ne us ko sanwara hai

wo god mein pal kar baDhta hai ya ek sanche mein Dhalta hai

kis pyar se man ko takta hai jab ghuTnon ke bal chalta hai

hai bap ka dil us par sadqe sau jaan se man us par wari

rah-rah ke ye aas lagate hain kab maktab ki ho tayyari

ummid hai ye ghar walon ko jis dam ye jawan ho jaega

kumbe mein izzat paega har bigDi ko ye banaega

wo bekas qabil-e-ibrat hai jo ranj uThae ghurbat mein

ho pichhe qafile walon se aur bhaTke rah musibat mein

raftar batati hai us ki ummid se taskin paega

wo sham ke hote manzil par gir paD ke pahunch hi jaega

gumrah na hon bhule-bhaTke ummid shua-e-mah bane

himmat se kanTa phul bane har zarra charagh-e-rah bane

ummid se hain zinda arman ummid se duniya qaem hai

ummid ki ranga-rangi se gulshan ka sarapa qaem hai

ummid hai aisi phulwari jis mein na guzar ho sarsar ka

ummid hai ek aisa dariya jis mein hai KHazana gauhar ka