us basti ke rahne wale

ai bādal ke pyāre TukḌo garjo na yahāñ barso na yahāñ

bikhrāo na tum is vaadī meñ ye sachche motī kī laḌiyāñ

paanī hai tumhārā pākīza bastī hai najāsat meñ ġhaltāñ

vo qaum karam kī ahl nahīñ pahne jo ġhulāmī kī kaḌiyāñ

phailāo na tum is vaadī meñ ye apne ruuī ke gaale

sab jakḌe haiñ zanjīroñ meñ is bastī ke rahne vaale

ai jannat kī bholī chiḌiyo gaao na yahāñ kī Dāloñ par

yaañ qaid zabāñ par hai sab kī pahra hai sab ke ḳhayāloñ par

qānūn kī bandish aa.ed hai vīroñ ke jangī aaloñ par

talvāreñ kund javānoñ kī muddat se zang hai bhāloñ par

phaile haiñ goshe goshe meñ zahrīlī siyāsat ke jaale

sab jakḌe haiñ zanjīroñ meñ is bastī ke rahne vaale

ai purvā ke ThanDe jhoñko dikhlāo na apnī shaan bahut

ham logoñ kī biptā sun kar ho jāoge hairān bahut

duniyā meñ chal-phir kar tum ne dekhe hoñge insān bahut

lekin is mulk ke bāshinde sab ke sab haiñ nādān bahut

har jaal meñ ye phañs jaate haiñ sīdhe-sādhe bhole-bhāle

sab jakḌe haiñ zanjīroñ meñ is bastī ke rahne vaale

ai dariyā kī chanchal lahro machlo na yahāñ ke sāhil par

tum chāñdī se baḌh kar ujlī tum sone se baḌh ke sundar

kyoñ apne jauhar khotī ho is gandī bastī meñ aa kar

Dar hai ki na tum par ho jaa.e ham logoñ kī sohbat kā asar

kaalī na kahīñ tum paḌ jaao ham to kahlāte haiñ kaale

sab jakḌe haiñ zanjīroñ meñ is bastī ke rahne vaale

ai chāñdī kī matvālī kirno pechīda yahāñ kī haiñ rāheñ

do haath kafan miltā bhī nahīñ ghabrā ke jo marnā bhī chāheñ

puurī ujrat paatī bhī nahīñ shal ho ke ġharīboñ kī bāheñ

bevāoñ ke aañsū be-qīmat be-kār yatīmoñ kī aaheñ

mazdūr kī nāzuk doshīza kartī hai ġharībī par naale

sab jakḌe haiñ zanjīroñ meñ is bastī ke rahne vaale

ai bhārat ke pāgal shā.ir ai hindostāñ ke 'salām'-e-hazīñ

bastī meñ ġhulāmoñ kī rah kar tū chheḌ na ye naġhmāt-e-hasīñ

uḌ jā tū vahāñ panchhī ban kar mil jaa.e jahāñ āzād zamīñ

āzād chaman āzād vatan āzād makāñ āzād makīñ

phaile hoñ jahāñ ke maidāñ meñ āzād sahar ke ujiyāle

sab jakḌe haiñ zanjīroñ meñ is bastī ke rahne vaale

ai baadal ke pyare TukDo garjo na yahan barso na yahan

bikhrao na tum is wadi mein ye sachche moti ki laDiyan

pani hai tumhaara pakiza basti hai najasat mein ghaltan

wo qaum karam ki ahl nahin pahne jo ghulami ki kaDiyan

phailao na tum is wadi mein ye apne rui ke gale

sab jakDe hain zanjiron mein is basti ke rahne wale

ai jannat ki bholi chiDiyo gao na yahan ki Dalon par

yan qaid zaban par hai sab ki pahra hai sab ke KHayalon par

qanun ki bandish aaed hai wiron ke jangi aalon par

talwaren kund jawanon ki muddat se zang hai bhaalon par

phaile hain goshe goshe mein zahrili siyasat ke jale

sab jakDe hain zanjiron mein is basti ke rahne wale

ai purwa ke ThanDe jhonko dikhlao na apni shan bahut

hum logon ki bipta sun kar ho jaoge hairan bahut

duniya mein chal-phir kar tum ne dekhe honge insan bahut

lekin is mulk ke bashinde sab ke sab hain nadan bahut

har jal mein ye phans jate hain sidhe-sadhe bhole-bhaale

sab jakDe hain zanjiron mein is basti ke rahne wale

ai dariya ki chanchal lahro machlo na yahan ke sahil par

tum chandi se baDh kar ujli tum sone se baDh ke sundar

kyon apne jauhar khoti ho is gandi basti mein aa kar

Dar hai ki na tum par ho jae hum logon ki sohbat ka asar

kali na kahin tum paD jao hum to kahlate hain kale

sab jakDe hain zanjiron mein is basti ke rahne wale

ai chandi ki matwali kirno pechida yahan ki hain rahen

do hath kafan milta bhi nahin ghabra ke jo marna bhi chahen

puri ujrat pati bhi nahin shal ho ke gharibon ki bahen

bewaon ke aansu be-qimat be-kar yatimon ki aahen

mazdur ki nazuk doshiza karti hai gharibi par nale

sab jakDe hain zanjiron mein is basti ke rahne wale

ai bhaarat ke pagal shair ai hindostan ke 'salam'-e-hazin

basti mein ghulamon ki rah kar tu chheD na ye naghmat-e-hasin

uD ja tu wahan panchhi ban kar mil jae jahan aazad zamin

aazad chaman aazad watan aazad makan aazad makin

phaile hon jahan ke maidan mein aazad sahar ke ujiyale

sab jakDe hain zanjiron mein is basti ke rahne wale