usne kaha!

saa.e baḌhne lage aur jaise kahīñ raat huī

der tak baiThe rahe āñkhoñ meñ āñkheñ Daale

phir dil-e-zār ne chupke se unheñ chuum liyā

hoñT tharrā.e ki kis tarah kī ye baat huī

pyārī āñkhoñ ne kahā ham to bahut haiñ maḳhmūr

koī nāshād rahe ham to abhī haiñ masrūr

zehn-e-shā.er bhī taḳhayyul meñ zarā jhuum liyā

baat utnī hī huī thī ki vo āñkheñ bolīñ

''bār-hā tum ne hamārī hī qasam khaa.ī hai

sach kaho jur.at-e-dil kaise kahāñ paa.ī hai

ham pe sadqe kiyā karte ho dil-o-jāñ lekin

raaz haiñ kaun se pinhāñ ye samajhte bhī ho!

kis tarah tum se kareñ ahd-e-vafā kī bāteñ

ajnabī hotā hai mehmāñ ye samajhte bhī ho!

Dūbne lagte ho jab yaas kī gahrā.ī meñ

bekasī ham se tumhārī nahīñ dekhī jātī!

jaam pe jaam chaḌhāte ho ki ġham kuchh bhī nahīñ

be-ḳhudī ham se tumhārī nahīñ dekhī jātī!

kyuuñ kahā karte ho duniyā hai ye ham kuchh bhī nahīñ

aise lamhoñ meñ bhalā kis ne sambhālā hai kaho

ġham-kade se tumheñ kis tarah nikālā hai kaho!

apne siine meñ bhī jazbāt ke tūfāñ haiñ magar

ham tumhārī hī tarah be-sar-o-sāmāñ haiñ magar

husn ke aaj har ik gaam pe saudā.ī haiñ

apnī nazreñ bhī to ab bā.is-e-rusvā.ī haiñ''

zehn-e-shā.er ne ye bāteñ bhī sunīñ kuchh na kahā

haath ḳhud baḌh ke na.ī tarah se hāthoñ se mile

āñkhoñ āñkhoñ meñ mohabbat kī na.ī baat huī

saa.e baḌhne lage aur jaise kahīñ raat huī

sae baDhne lage aur jaise kahin raat hui

der tak baiThe rahe aankhon mein aankhen Dale

phir dil-e-zar ne chupke se unhen chum liya

honT tharrae ki kis tarah ki ye baat hui

pyari aankhon ne kaha hum to bahut hain maKHmur

koi nashad rahe hum to abhi hain masrur

zehn-e-shaer bhi taKHayyul mein zara jhum liya

baat utni hi hui thi ki wo aankhen bolin

bar-ha tum ne hamari hi qasam khai hai

sach kaho jurat-e-dil kaise kahan pai hai

hum pe sadqe kiya karte ho dil-o-jaan lekin

raaz hain kaun se pinhan ye samajhte bhi ho!

kis tarah tum se karen ahd-e-wafa ki baaten

ajnabi hota hai mehman ye samajhte bhi ho!

Dubne lagte ho jab yas ki gahrai mein

bekasi hum se tumhaari nahin dekhi jati!

jam pe jam chaDhate ho ki gham kuchh bhi nahin

be-KHudi hum se tumhaari nahin dekhi jati!

kyun kaha karte ho duniya hai ye hum kuchh bhi nahin

aise lamhon mein bhala kis ne sambhaala hai kaho

gham-kade se tumhein kis tarah nikala hai kaho!

apne sine mein bhi jazbaat ke tufan hain magar

hum tumhaari hi tarah be-sar-o-saman hain magar

husn ke aaj har ek gam pe saudai hain

apni nazren bhi to ab bais-e-ruswai hain

zehn-e-shaer ne ye baaten bhi sunin kuchh na kaha

hath KHud baDh ke nai tarah se hathon se mile

aankhon aankhon mein mohabbat ki nai baat hui

sae baDhne lage aur jaise kahin raat hui