usne mujhe kyun rokna chaha

mujhe us se ta.alluq thā to bas itnā

ki merī chand sāñseñ kho ga.ī thiiñ us kī bastī meñ

magar maiñ ne use apnī mohabbat kā amiiñ jaanā

na us ne hī kabhī galiyoñ meñ chhup-chhup kar mujhe dekhā

kabhī ham raah meñ ik dūsre ke sāmne aa.e

to yuuñ jaise kisī ḳhāmosh station pe do saada musāfir

rail kī aamad par ik-dam chauñk kar ik dūsre ko ḳhauf se dekheñ

ab us ke aur mere darmiyān talvār sī kaalī masāfat hai

magar maiñ sochtā rahtā huuñ jab koī na thā aisā ta.alluq darmiyāñ

jis ko maiñ chāhat kā samar kahtā

to vo kyuuñ fāsla de kar bharī bastī kī sarhad tak mire pīchhe chalā aayā

aur us ne apnī bhīgī boltī āñkhoñ kī hasrat se

mujhe kyuuñ roknā chāhā

mujhe us se talluq tha to bas itna

ki meri chand sansen kho gai thin us ki basti mein

magar main ne use apni mohabbat ka amin jaana

na us ne hi kabhi galiyon mein chhup-chhup kar mujhe dekha

kabhi hum rah mein ek dusre ke samne aae

to yun jaise kisi KHamosh station pe do sada musafir

rail ki aamad par ik-dam chaunk kar ek dusre ko KHauf se dekhen

ab us ke aur mere darmiyan talwar si kali masafat hai

magar main sochta rahta hun jab koi na tha aisa talluq darmiyan

jis ko main chahat ka samar kahta

to wo kyun fasla de kar bhari basti ki sarhad tak mere pichhe chala aaya

aur us ne apni bhigi bolti aankhon ki hasrat se

mujhe kyun rokna chaha