use kahna december aaya hai

use kahnā december aayā hai

ḳhizāñ ne bahār kī ḳhūb-sūratī ko

chīnār ke zard pattoñ meñ dafn kar diyā hai

in pattoñ kī javānī ab buḌhāpe kī siskiyoñ

meñ ro rahī hai

ab ye ronā bhī rafta rafta dam toḌ degā

aur apne ma.ashūq kī be-bas Tahniyoñ se

judā.ī kā karb sahte sahte

ye sūkhe patte ḳhāk-nashīn ho jā.eñge

phir kaun inheñ yaad rakhegā

use kahnā ki vo gulshan

jis ke phūloñ kī ḳhūb-sūratī dekhne vāloñ kī āñkhoñ ko bhī

ḳhūbsūrat banā detī thī

aur jis kī mahak

saañs meñ bhī ḳhushbū ghol detī thī

use ab

ūñghte bulbul hasrat se tak rahe haiñ

vo bulbul jinhoñ ne gulshan meñ bahār ke naġhme

gaa.e the

jin kī surīlī āvāz par titliyāñ phūloñ ke gird raqs karte karte

qaus-e-quzah ko bhī sharminda kar detī thiiñ

lekin ab mausam badalte hī na jaane vo titliyāñ

phūloñ kā mazāq uḌā kar kis des ko jā basīñ

dāstān-e-hijr sunā kar zarā ġhaur se dekhnā

ki un jhiil sī āñkhoñ kā rang piilā paḌ jaatā hai yā ki

niilā hī rahtā hai

aur sabr se sunñā ki

un gulābī hoñToñ se bhauñre ke shauq meñ

aah nikaltī hai yā ki vaah

use kahna december aaya hai

KHizan ne bahaar ki KHub-surati ko

chinar ke zard patton mein dafn kar diya hai

in patton ki jawani ab buDhape ki siskiyon

mein ro rahi hai

ab ye rona bhi rafta rafta dam toD dega

aur apne mashuq ki be-bas Tahniyon se

judai ka karb sahte sahte

ye sukhe patte KHak-nashin ho jaenge

phir kaun inhen yaad rakhega

use kahna ki wo gulshan

jis ke phulon ki KHub-surati dekhne walon ki aankhon ko bhi

KHubsurat bana deti thi

aur jis ki mahak

sans mein bhi KHushbu ghol deti thi

use ab

unghte bulbul hasrat se tak rahe hain

wo bulbul jinhon ne gulshan mein bahaar ke naghme

gae the

jin ki surili aawaz par titliyan phulon ke gird raqs karte karte

qaus-e-quzah ko bhi sharminda kar deti thin

lekin ab mausam badalte hi na jaane wo titliyan

phulon ka mazaq uDa kar kis des ko ja basin

dastan-e-hijr suna kar zara ghaur se dekhna

ki un jhil si aankhon ka rang pila paD jata hai ya ki

nila hi rahta hai

aur sabr se sunna ki

un gulabi honTon se bhaunre ke shauq mein

aah nikalti hai ya ki wah