wada

is se pahle ki terī chashm-e-karam

ma.azarat kī nigāh ban jaa.e

is se pahle ki tere baam kā husn

rif.at-e-mehr-o-māh ban jaa.e

pyaar Dhal jaa.e mere ashkoñ meñ

aarzū ek aah ban jaa.e

mujh pe aa jaa.e ishq kā ilzām

aur tū be-gunāh ban jaa.e

maiñ tirā shahr chhoḌ jā.ūñgā

is se pahle ki sādgī terī

lab-e-ḳhāmosh ko gila kah de

maiñ tujhe chāragar ḳhayāl karūñ

tū mire ġham ko lā-davā kah de

terī majbūriyāñ na dekh sake

aur dil tujh ko bevafā kah de

jaane maiñ be-ḳhudī meñ kyā pūchhūñ

jaane tū be-ruḳhī se kyā kah de

maiñ tirā shahr chhoḌ jā.ūñgā

chāra-e-dard ho bhī saktā thā

mujh ko itnī ḳhushī bahut kuchh hai

pyaar go jāvedāñ nahīñ phir bhī

pyaar kī yaad bhī bahut kuchh hai

aane vaale dinoñ kī zulmat meñ

aaj kī raushnī bahut kuchh hai

us tahī-dāmanī ke aalam meñ

jo milā hai vahī bahut kuchh hai

maiñ tirā shahr chhoḌ jā.ūñgā

chhoḌ kar sāhil-e-murād chalā

ab safīna mirā kahīñ Thahre

zahar piinā mirā muqaddar hai

aur tire hoñT añgbīñ Thahre

kis tirā tere āstāñ pe rukūñ

jab na paañv tale zamīñ Thahre

us se behtar hai dil yahī samjhe

tū ne rokā thā ham nahīñ Thahre

maiñ tirā shahr chhoḌ jā.ūñgā

mujh ko itnā zarūr kahnā hai

vaqt-e-ruḳhsat salām se pahle

koī naama nahīñ likhā maiñ ne

tere harf-e-payām se pahle

toḌ luuñ rishta-e-nazar meñ bhī

tum utar jaao baam se pahle

le mirī jaan merā va.ada hai

kal kisī vaqt shaam se pahle

maiñ tirā shahr chhoḌ jā.ūñgā

is se pahle ki teri chashm-e-karam

mazarat ki nigah ban jae

is se pahle ki tere baam ka husn

rifat-e-mehr-o-mah ban jae

pyar Dhal jae mere ashkon mein

aarzu ek aah ban jae

mujh pe aa jae ishq ka ilzam

aur tu be-gunah ban jae

main tera shahr chhoD jaunga

is se pahle ki sadgi teri

lab-e-KHamosh ko gila kah de

main tujhe chaaragar KHayal karun

tu mere gham ko la-dawa kah de

teri majburiyan na dekh sake

aur dil tujh ko bewafa kah de

jaane main be-KHudi mein kya puchhun

jaane tu be-ruKHi se kya kah de

main tera shahr chhoD jaunga

chaara-e-dard ho bhi sakta tha

mujh ko itni KHushi bahut kuchh hai

pyar go jawedan nahin phir bhi

pyar ki yaad bhi bahut kuchh hai

aane wale dinon ki zulmat mein

aaj ki raushni bahut kuchh hai

us tahi-damani ke aalam mein

jo mila hai wahi bahut kuchh hai

main tera shahr chhoD jaunga

chhoD kar sahil-e-murad chala

ab safina mera kahin Thahre

zahar pina mera muqaddar hai

aur tere honT angbin Thahre

kis tera tere aastan pe rukun

jab na panw tale zamin Thahre

us se behtar hai dil yahi samjhe

tu ne roka tha hum nahin Thahre

main tera shahr chhoD jaunga

mujh ko itna zarur kahna hai

waqt-e-ruKHsat salam se pahle

koi nama nahin likha main ne

tere harf-e-payam se pahle

toD lun rishta-e-nazar mein bhi

tum utar jao baam se pahle

le meri jaan mera wada hai

kal kisi waqt sham se pahle

main tera shahr chhoD jaunga