waba ke dinon ka safar-nama

1

shahr ḳhālī karvā liyā jaatā hai

aur vabā ke dinoñ meñ mohabbat

mamnū’ qarār paatī hai

kirāya-nāmoñ se

ka.ī shahroñ ke naam ġhā.eb ho

jaate haiñ

aur

sāhilī āñkheñ

Daak ke intizār meñ

būḌhī hone lagtī haiñ

march kī sadā-bahār sah-pahroñ meñ

vaqt

kabhī kabhī

jhurjhurī le kar uThtā hai

aur phir ūñghne lag jaatā hai

train ek sunsān station par rok lī jaatī hai

2

yahāñ

maut

kaḌve bādāmoñ kī

mahak ban kar phail rahī hai

sard āñkheñ be-rang chehre

us kī dahshat se

pathrāne lage haiñ

purāne daraḳhtoñ

kī darāḌoñ meñ

saañp base haiñ

sāl-ḳhūrda havelī

kisī qadīm peshīn-goī ke

ḳhauf meñ Duubī hai

aur

chāñdnī baaġh ko

jhaḌte pattoñ kī

chādar ne Dhāñp liyā hai

3

suno

agar bosoñ pe ‘aa.ed pābandī

ḳhatm hone se pahle

maiñ lauT kar na aa sakā to

to ye ḳhat

merī āḳhirī nishānī samajh kar

mahfūz kar lenā

4

ranj-bharī dopahar

gulābī shāmoñ kī yaad meñ

tulū' hotī hai

aur saa.e lambe ho kar

āñkhoñ tak aa jaate haiñ

qasba udaas hai

ki is baar

nauroz kā tehvār

manāyā nahīñ jā sakā

gul-e-do-pahrī ke phuul

gamloñ meñ murjhā ga.e haiñ

gharoñ kī khiḌkiyoñ par

jastī chādareñ chaḌhī haiñ

kamre meñ nīm-tārīk mohabbat kī

yādgāreñ dhuñdlā rahī haiñ

aur photo frames pe jamī gard

siyāh hone lagī hai

5

sabz lahreñ

jazīre kā kināra kāTtī haiñ

to surḳh bārish

khaprail kī chhatoñ par nāchne lagtī hai

maiñ ye nazm

purānī rum kī botal meñ Daal kar

samundar ke havāle kar rahā huuñ

agar āḳhirī sūraj

ġhurūb hone se pahle

ye tumheñ mausūl ho jaa.e

to merī tasvīr ke saath

vaale frame meñ lagā denā

6

merī saarī zamīn

girvī rakh lī ga.ī

aur

puurā āsmān

sar se chhīn liyā gayā

vo vabā ke ibtidā.ī din the

jab tum

mere qarīb aa.iiñ

aur vabā ḳhatm hone se pahle

ruḳhsat ho ga.iiñ

tumhāre jaane par

saarā qasba

udāsī se bhar gayā

lekin

maiñ apnī āñkhoñ meñ

do buuñd aañsū bhī

ikaTThe na kar sakā

ik jhulastī shaam meñ

mujhe khurche hue

siyāh lafzoñ kā vasiyyat-nāma

unhoñ ne thamāyā

jinhoñ ne

kisī raushan tehvār par

mujhe yaad nahīñ kiyā thā

7

maiñ yahāñ

ukhaḌtī sāñsoñ meñ paivand

lagāte thak chukā huuñ

pushtainī siyāh chādar

mere shāne udheḌ rahī hai

ek din maiñ

isī chādar meñ lipTā

is zamīn meñ so jā.ūñgā

jahāñ

mujhe jānñe vaalā

koī nahīñ hai

1

shahr KHali karwa liya jata hai

aur waba ke dinon mein mohabbat

mamnu’ qarar pati hai

kiraya-namon se

kai shahron ke nam ghaeb ho

jate hain

aur

sahili aankhen

Dak ke intizar mein

buDhi hone lagti hain

march ki sada-bahaar sah-pahron mein

waqt

kabhi kabhi

jhurjhuri le kar uThta hai

aur phir unghne lag jata hai

train ek sunsan station par rok li jati hai

2

yahan

maut

kaDwe baadamon ki

mahak ban kar phail rahi hai

sard aankhen be-rang chehre

us ki dahshat se

pathrane lage hain

purane daraKHton

ki daraDon mein

sanp base hain

sal-KHurda haweli

kisi qadim peshin-goi ke

KHauf mein Dubi hai

aur

chandni bagh ko

jhaDte patton ki

chadar ne Dhanp liya hai

3

suno

agar boson pe ‘aed pabandi

KHatm hone se pahle

main lauT kar na aa saka to

to ye KHat

meri aaKHiri nishani samajh kar

mahfuz kar lena

4

ranj-bhari dopahar

gulabi shamon ki yaad mein

tulu' hoti hai

aur sae lambe ho kar

aankhon tak aa jate hain

qasba udas hai

ki is bar

nauroz ka tehwar

manaya nahin ja saka

gul-e-do-pahri ke phul

gamlon mein murjha gae hain

gharon ki khiDkiyon par

jasti chadaren chaDhi hain

kamre mein nim-tarik mohabbat ki

yaadgaren dhundla rahi hain

aur photo frames pe jami gard

siyah hone lagi hai

5

sabz lahren

jazire ka kinara kaTti hain

to surKH barish

khaprail ki chhaton par nachne lagti hai

main ye nazm

purani rum ki botal mein Dal kar

samundar ke hawale kar raha hun

agar aaKHiri suraj

ghurub hone se pahle

ye tumhein mausul ho jae

to meri taswir ke sath

wale frame mein laga dena

6

meri sari zamin

girwi rakh li gai

aur

pura aasman

sar se chhin liya gaya

wo waba ke ibtidai din the

jab tum

mere qarib aain

aur waba KHatm hone se pahle

ruKHsat ho gain

tumhaare jaane par

sara qasba

udasi se bhar gaya

lekin

main apni aankhon mein

do bund aansu bhi

ikaTThe na kar saka

ek jhulasti sham mein

mujhe khurche hue

siyah lafzon ka wasiyyat-nama

unhon ne thamaya

jinhon ne

kisi raushan tehwar par

mujhe yaad nahin kiya tha

7

main yahan

ukhaDti sanson mein paiwand

lagate thak chuka hun

pushtaini siyah chadar

mere shane udheD rahi hai

ek din main

isi chadar mein lipTa

is zamin mein so jaunga

jahan

mujhe jaanne wala

koi nahin hai