wajd

zindagī ghūmtī chakrātī hai bal khātī hai

aur phir vajd ke nuqte pe Thahar jaatī hai

dā.ere chaar taraf raqs-kunāñ rahte haiñ

dil-e-āvāra Thahar jaa.e jahāñ zaad ruke

raqs ke din pe chaḌhī gardish-e-hālāt kī dhuup

raqs be-ḳhud meñ mirā shauq-e-junūñ shāmil hai

jhūmtā nāchtā rahtā hai zamāna saarā

titliyāñ mor parinde to kahīñ āb-e-ravāñ

sham.a kī aañkh se bahte haiñ musalsal aañsū

aur sho.ale kī lapak par kahīñ mahke roTī

tez kirnoñ se kisī koh kī pighle chāñdī

dhuup aur chhāñv meñ lipTe hue chāroñ mausam

ik tamāshā hai ki zāhir hai nazar ke aage

dhuup ke rang ko lāzim hai siyāhī shab kī

aur siyāhī to nahīñ bhed se ḳhālī 'tashna'

lekin us bhed ko paane kī kahāñ koshish kī

ek lamhe meñ usī bhed kī lau shāmil hai

aur vahī vasl kā lamha to mirā hāsil hai

koī is pal se kaho hosh meñ laa.e mujh ko

niiñd aatī hai magar ishq jagā.e mujh ko

aañkh kī putlī siyah rang dikhā.e mujh ko

raqs-o-āhañg hī insān banā.e mujh ko

zindagī chāk-e-musalsal pe paḌī ghūmtī hai

jism roTī ke nivāloñ meñ phañsā.e mujh ko

tere qur.ān meñ bahtā huā sargam maḳhfī

aur zamzam ke liye ḳhaak ragaḌtī eḌī

duur mandir meñ kalīsāoñ meñ bajtī ghanTī

ghūmtā jaa.e falak aur ye zamīñ kī chakkī

aur is sab meñ mujhe ghar kā banā kar qaidī

nuur karte ho atā mujh ko banā kar miTTī

aañkh sotī hai to bātin ko jagā dete ho

tum pilāte ho magar pyaas baḌhā dete ho

aur 'tashna' jo kabhī vajd meñ allāh likhe

tum usī vajd ke nuqte ko miTā dete ho

aur na.e rang ke gulzār khilā dete ho

vajd ke nuqte pe ye raqs-e-jahāñ ruktā hai

vajd kā nuqta miTā do to vahad bachtā hai

zindagi ghumti chakraati hai bal khati hai

aur phir wajd ke nuqte pe Thahar jati hai

daere chaar taraf raqs-kunan rahte hain

dil-e-awara Thahar jae jahan zad ruke

raqs ke din pe chaDhi gardish-e-haalat ki dhup

raqs be-KHud mein mera shauq-e-junun shamil hai

jhumta nachta rahta hai zamana sara

titliyan mor parinde to kahin aab-e-rawan

shama ki aankh se bahte hain musalsal aansu

aur shoale ki lapak par kahin mahke roTi

tez kirnon se kisi koh ki pighle chandi

dhup aur chhanw mein lipTe hue chaaron mausam

ek tamasha hai ki zahir hai nazar ke aage

dhup ke rang ko lazim hai siyahi shab ki

aur siyahi to nahin bhed se KHali 'tashna'

lekin us bhed ko pane ki kahan koshish ki

ek lamhe mein usi bhed ki lau shamil hai

aur wahi wasl ka lamha to mera hasil hai

koi is pal se kaho hosh mein lae mujh ko

nind aati hai magar ishq jagae mujh ko

aankh ki putli siyah rang dikhae mujh ko

raqs-o-ahang hi insan banae mujh ko

zindagi chaak-e-musalsal pe paDi ghumti hai

jism roTi ke niwalon mein phansae mujh ko

tere quran mein bahta hua sargam maKHfi

aur zamzam ke liye KHak ragaDti eDi

dur mandir mein kalisaon mein bajti ghanTi

ghumta jae falak aur ye zamin ki chakki

aur is sab mein mujhe ghar ka bana kar qaidi

nur karte ho ata mujh ko bana kar miTTi

aankh soti hai to baatin ko jaga dete ho

tum pilate ho magar pyas baDha dete ho

aur 'tashna' jo kabhi wajd mein allah likhe

tum usi wajd ke nuqte ko miTa dete ho

aur nae rang ke gulzar khila dete ho

wajd ke nuqte pe ye raqs-e-jahan rukta hai

wajd ka nuqta miTa do to wahad bachta hai