waqt aur dariya

vaqt aur dariyā haiñ do chīzeñ judā

phir bhī in meñ mushtarak hai baat kyā

hai mizāj-e-vaqt-o-dariyā ek sā

vaqt guzrā aur dariyā bah gayā

vaqt guzrā vāpas aa saktā nahīñ

koī koshish se bhī lā saktā nahīñ

yūñhī dariyā kā jo paanī bah gayā

aaj tak vāpas na koī lā sakā

paanī to bah kar samundar meñ girā

aur vaqt āfāq meñ gum ho gayā

go ba-zāhir ek haiñ donoñ magar

farq ik bārīk aatā hai nazar

āb-e-dariyā bah ke jā pahuñchā jahāñ

lahlahātī haiñ vahāñ par khetiyāñ

ya.anī paanī jis jagah ho kar bahā

phir vahāñ ifrāt se sabza ugā

ya.anī jis jā se guzar jaatā hai ye

vo zamīñ zarḳhez kar jaatā hai ye

ya.anī bah kar ye bahar-sūrat 'nisār'

chhoḌtā hai apne pīchhe sabza-zār

vaqt hī kā masraf-e-jā.ez 'nisār'

bāġh-e-hastī ko hai kartā pur-bahār

haañ magar jab rā.egāñ jaatā hai vaqt

chhoḌ kar vīrāniyāñ jaatā hai vaqt

waqt aur dariya hain do chizen juda

phir bhi in mein mushtarak hai baat kya

hai mizaj-e-waqt-o-dariya ek sa

waqt guzra aur dariya bah gaya

waqt guzra wapas aa sakta nahin

koi koshish se bhi la sakta nahin

yunhi dariya ka jo pani bah gaya

aaj tak wapas na koi la saka

pani to bah kar samundar mein gira

aur waqt aafaq mein gum ho gaya

go ba-zahir ek hain donon magar

farq ek barik aata hai nazar

aab-e-dariya bah ke ja pahuncha jahan

lahlahati hain wahan par khetiyan

yani pani jis jagah ho kar baha

phir wahan ifraat se sabza uga

yani jis ja se guzar jata hai ye

wo zamin zarKHez kar jata hai ye

yani bah kar ye bahar-surat 'nisar'

chhoDta hai apne pichhe sabza-zar

waqt hi ka masraf-e-jaez 'nisar'

bagh-e-hasti ko hai karta pur-bahaar

han magar jab raegan jata hai waqt

chhoD kar viraniyan jata hai waqt