waqt

bas aur ghaḌī do ghaḌī sahī

phir vaqt ke pyāle se girtī

hastī kī riit ko

pyāla ḳhālī karnā hai

har baazī vaqt kī baazī thī

har baazī par shah maat huī

ab dāman jhaaḌ ke uTTheñge

saarī mehnat barbād huī

ḳhushnūdī-e-vaqt kī ḳhātir ham

bas kyā kyā baar uThāte haiñ

ham aas kī shabnam bote haiñ

aur yaas ke sahrā paate haiñ

zāhir meñ to himmat oḌhe haiñ

aur andar TūTte jaate haiñ

ye ilm kī tāqat

dil kī sadāqat

qalam kī himmat

apne liye sab nā-samjhī kī bāteñ haiñ

ye jāh-o-hasham bhī un ke haiñ

jo shādābī ke paale haiñ

apnī to himmat sarf huī

saarī mehnat barbād huī

jo dil ke tahoñ meñ TuuT gayā

jo andar andar biit ga.ī

us kāhish-e-jāñ kā zikr hī kyā

ab muTThī ret kī baazī hai

so kaun sī aisī baazī hai

ab haar aur jiit kī fikr hī kyā

sab jaan liyā sab dekh liyā

jab sab raste be-manzil haiñ

jab sab lamhe patthar-dil haiñ

jab socheñ sab lā-hāsil haiñ

phir kyā socheñ phir kyoñ socheñ

lo ham ḳhud apnī muTThī se ye ret girā.e dete haiñ

yā Thahr ke samjhe vaqt hameñ

yā ham Thahrā.e dete haiñ

bas aur ghaDi do ghaDi sahi

phir waqt ke pyale se girti

hasti ki rit ko

pyala KHali karna hai

har bazi waqt ki bazi thi

har bazi par shah mat hui

ab daman jhaD ke uTThenge

sari mehnat barbaad hui

KHushnudi-e-waqt ki KHatir hum

bas kya kya bar uThate hain

hum aas ki shabnam bote hain

aur yas ke sahra pate hain

zahir mein to himmat oDhe hain

aur andar TuTte jate hain

ye ilm ki taqat

dil ki sadaqat

qalam ki himmat

apne liye sab na-samjhi ki baaten hain

ye jah-o-hasham bhi un ke hain

jo shadabi ke pale hain

apni to himmat sarf hui

sari mehnat barbaad hui

jo dil ke tahon mein TuT gaya

jo andar andar bit gai

us kahish-e-jaan ka zikr hi kya

ab muTThi ret ki bazi hai

so kaun si aisi bazi hai

ab haar aur jit ki fikr hi kya

sab jaan liya sab dekh liya

jab sab raste be-manzil hain

jab sab lamhe patthar-dil hain

jab sochen sab la-hasil hain

phir kya sochen phir kyon sochen

lo hum KHud apni muTThi se ye ret girae dete hain

ya Thahr ke samjhe waqt hamein

ya hum Thahrae dete hain