waqt ek mahbub hai

ajab mahbūbiyat sī vaqt kī fitrat meñ hotī hai

kabhī dil ko lubhātā hai

to phir us kī ināyat kā tasalsul kam nahīñ hotā

musalsal abr-e-rahmat kī tarah

dil kī darāḌoñ meñ bhī rastā hai

mohabbat kī piyāsī sarzamīñ sairāb kartā hai

kabhī din kī sabāhat zeb-e-tan kar ke

ujāle bāñTtā hai

aur kabhī kaalī ridā.eñ oḌh kar

shab ke sukūt-e-jāñ-fizā meñ saañs letā hai

kabhī ye paas aa kar baiTh jaatā hai

ye kahtā hai

chalo guzre zamāne kī mohabbat yaad karte haiñ

to mere zehn-āñgan meñ

yādeñ bachpanā aur phir laḌakpan oḌh kar

itrā ke chaltī haiñ

koī dil ke kivāḌoñ ko

achānak nīm-vā kar ke zarā sā muskurātā hai

mirī banjar zamīnoñ par tarāvat ātī-jātī hai

kasāfat dhultī jaatī hai

kabhī ye chalte chalte dauḌ kar aage nikaltā hai

ki aao aur mujhe chhū lo

magar maiñ nā-rasā.ī-āshnā

us se hamesha do-qadam pīchhe hī rahtā huuñ

kabhī bāheñ gale meñ Daal detā hai

baḌī mahjūb sī nazroñ se taktā hai

to ġham kī sañglāḳhī meñ darāḌeñ Daal detā hai

kabhī ik sham.a raushan kar ke kahtā hai

lapaktī dauḌtī is zindagī meñ

aaj tum kitne baras ke ho

achānak ruuTh jaatā hai

koī minnat koī zaarī nahīñ suntā

kisī sūrat nahīñ mantā

use apnā banāo bhī

to ye apnā nahīñ rahtā

kabhī ye dastaras meñ hī nahīñ rahtā

havā par paañv rakhtā hai

ḳhalā meñ phail jaatā hai

had-e-imkān se bāhar nikaltā hai

makāñ se lā-makāñ tak jis qadar vus.at mayassar hai

vahāñ tak jhilmilātā hai

maiñ sar-tā-pā tahayyur huuñ

magar us kī tilismī qaid meñ ḳhush huuñ

usī zindāñ meñ rahtā huuñ

usī meñ saañs letā huuñ

ajab mahbubiyat si waqt ki fitrat mein hoti hai

kabhi dil ko lubhata hai

to phir us ki inayat ka tasalsul kam nahin hota

musalsal abr-e-rahmat ki tarah

dil ki daraDon mein bhi rasta hai

mohabbat ki piyasi sarzamin sairab karta hai

kabhi din ki sabahat zeb-e-tan kar ke

ujale banTta hai

aur kabhi kali ridaen oDh kar

shab ke sukut-e-jaan-fiza mein sans leta hai

kabhi ye pas aa kar baiTh jata hai

ye kahta hai

chalo guzre zamane ki mohabbat yaad karte hain

to mere zehn-angan mein

yaaden bachpana aur phir laDakpan oDh kar

itra ke chalti hain

koi dil ke kiwaDon ko

achanak nim-wa kar ke zara sa muskuraata hai

meri banjar zaminon par tarawat aati-jati hai

kasafat dhulti jati hai

kabhi ye chalte chalte dauD kar aage nikalta hai

ki aao aur mujhe chhu lo

magar main na-rasai-ashna

us se hamesha do-qadam pichhe hi rahta hun

kabhi bahen gale mein Dal deta hai

baDi mahjub si nazron se takta hai

to gham ki sanglaKHi mein daraDen Dal deta hai

kabhi ek shama raushan kar ke kahta hai

lapakti dauDti is zindagi mein

aaj tum kitne baras ke ho

achanak ruTh jata hai

koi minnat koi zari nahin sunta

kisi surat nahin manta

use apna banao bhi

to ye apna nahin rahta

kabhi ye dastaras mein hi nahin rahta

hawa par panw rakhta hai

KHala mein phail jata hai

had-e-imkan se bahar nikalta hai

makan se la-makan tak jis qadar wusat mayassar hai

wahan tak jhilmilata hai

main sar-ta-pa tahayyur hun

magar us ki tilismi qaid mein KHush hun

usi zindan mein rahta hun

usi mein sans leta hun