waqt

vaqt apnā bhī hai parāyā bhī

ye kaḌī dhuup bhī hai saayā bhī

gaah rotoñ ko vo hañsātā hai

gaah hañstoñ ko vo rulātā hai

chhīn kar apnoñ ko vo jaatā hai

kabhī bichhḌoñ ko vo milātā hai

ġham ke naġhme kabhī sunātā hai

kabhī ḳhushiyoñ ke giit gaatā hai

hai vo barkhā bahār kī sūrat

aur kabhī hai ḳhizāñ-zada mūrat

raushnī hai kabhī kabhī zulmat

hai mohabbat bhī vo kabhī fursat

hādse us ke saath rahte haiñ

charḳh tak us ke haath rahte haiñ

raaz ye jānñā nahīñ āsāñ

is ko pahchānñā nahīñ āsāñ

hai vo aashā bhī aur nirāshā bhī

sau tamāshoñ kā ik tamāshā bhī

vaqt par jo nigāh kartā hai

vaqt us se nibāh kartā hai

waqt apna bhi hai paraya bhi

ye kaDi dhup bhi hai saya bhi

gah roton ko wo hansata hai

gah hanston ko wo rulata hai

chhin kar apnon ko wo jata hai

kabhi bichhDon ko wo milata hai

gham ke naghme kabhi sunata hai

kabhi KHushiyon ke git gata hai

hai wo barkha bahaar ki surat

aur kabhi hai KHizan-zada murat

raushni hai kabhi kabhi zulmat

hai mohabbat bhi wo kabhi fursat

hadse us ke sath rahte hain

charKH tak us ke hath rahte hain

raaz ye jaanna nahin aasan

is ko pahchanna nahin aasan

hai wo aasha bhi aur nirasha bhi

sau tamashon ka ek tamasha bhi

waqt par jo nigah karta hai

waqt us se nibah karta hai