washkuru li wa-la-takfurun

āsmāñ par garm sūraj ke bhayānak qahqahe

dauḌtī thiiñ zahr lahreñ saañs khul kar kaun le

aag ke dariyā ravāñ sab shāhrāheñ rāste

jal rahī thiiñ dhuup kī bārish meñ saarī khetiyāñ

sar uThā.e zard-rū sūkhī nukīlī jhāḌiyāñ

aur un ke darmiyāñ

nāchtī thiiñ be-hayā kam-zarf nangī Dā.ineñ

chīḳh bad-rūheñ suneñ kyā tai kiyā chupke raheñ

be-zabānī kī vasātat se kaheñ

joḌ kar dast-e-savāl

ai ḳhudā-e-zul-jalāl

ḳhatm tujh par har kamāl

sā’ateñ phailā rahī haiñ maut kī nīñdoñ kā jaal

jāgtī jiitī magar ik terī zaat

roz-e-raushan ho ki raat

ik faqat tujh ko sabāt

kaun degā māsivā tere najāt

abr ban kar saaya kar de

sabz kar de khetiyāñ

aa hamārī soch meñ aa

tū hamāre haath ho jā tū zabāñ

ḳhāliq-e-arz-o-samā

narm miTTī kī ridā sar se haTā.e

dekhtī haiñ koñpleñ palkeñ uThā.e

ab kisānoñ kā tasavvur chhū rahā hai bāliyāñ

muskurā āñkheñ milā sharmā.e haiñ ghar-vāliyāñ

saj rahī haiñ thāliyāñ

baj rahī haiñ tāliyāñ

hañs rahī haiñ gā rahī haiñ sāliyāñ

ab du'ā.eñ ho ga.ī haiñ mīThī khaTTī gāliyāñ

āsmāñ par ai ḳhudā terā jalāl

aur zamīñ merī huī gahvāra-e-amn-o-amāñ

paak bad-rūhoñ se hai merā jahāñ

aasman par garm suraj ke bhayanak qahqahe

dauDti thin zahr lahren sans khul kar kaun le

aag ke dariya rawan sab shahrahen raste

jal rahi thin dhup ki barish mein sari khetiyan

sar uThae zard-ru sukhi nukili jhaDiyan

aur un ke darmiyan

nachti thin be-haya kam-zarf nangi Dainen

chiKH bad-ruhen sunen kya tai kiya chupke rahen

be-zabani ki wasatat se kahen

joD kar dast-e-sawal

ai KHuda-e-zul-jalal

KHatm tujh par har kamal

sa’aten phaila rahi hain maut ki nindon ka jal

jagti jiti magar ek teri zat

roz-e-raushan ho ki raat

ek faqat tujh ko sabaat

kaun dega masiwa tere najat

abr ban kar saya kar de

sabz kar de khetiyan

aa hamari soch mein aa

tu hamare hath ho ja tu zaban

KHaliq-e-arz-o-sama

narm miTTi ki rida sar se haTae

dekhti hain konplen palken uThae

ab kisanon ka tasawwur chhu raha hai baaliyan

muskura aankhen mila sharmae hain ghar-waliyan

saj rahi hain thaaliyan

baj rahi hain taliyan

hans rahi hain ga rahi hain saliyan

ab du'aen ho gai hain miThi khaTTi galiyan

aasman par ai KHuda tera jalal

aur zamin meri hui gahwara-e-amn-o-aman

pak bad-ruhon se hai mera jahan