watan se jate hue

duur tujh se ai vatan kī sarzamīñ jaatā huuñ maiñ

jaane kyoñ tere chaman-zāroñ se ghabrātā huuñ maiñ

tere phūloñ meñ na paa.ī maiñ ne ḳhushbu-e-vafā

tujh se chhuTnā phir bhī hai mere liye sabr-āzmā

ai vatan aa.e tujhe shāyad kabhī merā ḳhayāl

terī nazroñ meñ haiñ merī zindagī ke māh-o-sāl

aañkh ko pur-nam na karnā dekh merī yaad meñ

tū na ThanDī saañs bharnā dekh merī yaad meñ

chañd dinoñ ke vāste honā na tū andoh-gīñ

ho na jaa.e nam kahīñ ġham ke pasīne se jabīñ

jāntā huuñ mujh ko DhūñDhegī tirī fasl-e-bahār

baaġh kī rangīniyāñ pūchheñgī mujh ko bār-bār

muskurāte phuul dohrā.eñge mere naam ko

tazkire ahbāb farmā.eñge aksar shaam ko

chuTkiyāñ legī diloñ meñ mere naġhmoñ kī miThās

shāyad ab tālāb kī saarī fazā hogī udaas

ġham kī maarī maañ ko merā dhyān aa.egā zarūr

kyā karūñ ḳhud ho rahā huuñ dāman-e-rahmat se duur

chhuT rahā huuñ us kī āġhosh-e-mohabbat se magar

yaad us kī saath hogī aur duā.eñ rāhbar

bad-gumāñ honā na maiñ rasm-e-vafā se duur huuñ

chhoḌ kar tujh ko na jaatā ai vatan majbūr huuñ

dur tujh se ai watan ki sarzamin jata hun main

jaane kyon tere chaman-zaron se ghabraata hun main

tere phulon mein na pai main ne KHushbu-e-wafa

tujh se chhuTna phir bhi hai mere liye sabr-azma

ai watan aae tujhe shayad kabhi mera KHayal

teri nazron mein hain meri zindagi ke mah-o-sal

aankh ko pur-nam na karna dekh meri yaad mein

tu na ThanDi sans bharna dekh meri yaad mein

chand dinon ke waste hona na tu andoh-gin

ho na jae nam kahin gham ke pasine se jabin

jaanta hun mujh ko DhunDhegi teri fasl-e-bahaar

bagh ki ranginiyan puchhengi mujh ko bar-bar

muskuraate phul dohraenge mere nam ko

tazkire ahbab farmaenge aksar sham ko

chuTkiyan legi dilon mein mere naghmon ki miThas

shayad ab talab ki sari faza hogi udas

gham ki mari man ko mera dhyan aaega zarur

kya karun KHud ho raha hun daman-e-rahmat se dur

chhuT raha hun us ki aaghosh-e-mohabbat se magar

yaad us ki sath hogi aur duaen rahbar

bad-guman hona na main rasm-e-wafa se dur hun

chhoD kar tujh ko na jata ai watan majbur hun