watan

tire kisān ke siine meñ hasratoñ kā hujūm

tirī fazāoñ meñ har beTī maañ bahan maġhmūm

tire ġharīb kī āñkhoñ meñ sail-e-ashk ravāñ

tū ik vatan hai ki ujḌe hue vatan kā nishāñ

khiñchī huiiñ tire māthe pe is qadar shikneñ

khaḌī huiiñ tire siine pe itnī dīvāreñ

bahā hai kitnā lahū aaj tere dāman par

ḳhizāñ ye kis ne bichā.ī hai tere gulshan par

udaas āñkhoñ meñ kitne ḳhushī ke ḳhvāb haiñ aaj

tirī zamīn ke qarz ham pe be-hisāb haiñ aaj

ham ek sub.h-e-daraḳhshāñ ko ab taraste haiñ

añdhere terī fazāoñ ke ham ko Daste haiñ

koī to aa.e jo ham ko jagā.e ġhaflat se

ki ham bhī uTh ke sañvāreñ tujhe mohabbat se

tire vajūd ne jaise hameñ sañvārā hai

tire ḳhulūs ne jaise hameñ nikhārā hai

tere kisan ke sine mein hasraton ka hujum

teri fazaon mein har beTi man bahan maghmum

tere gharib ki aankhon mein sail-e-ashk rawan

tu ek watan hai ki ujDe hue watan ka nishan

khinchi huin tere mathe pe is qadar shiknen

khaDi huin tere sine pe itni diwaren

baha hai kitna lahu aaj tere daman par

KHizan ye kis ne bichai hai tere gulshan par

udas aankhon mein kitne KHushi ke KHwab hain aaj

teri zamin ke qarz hum pe be-hisab hain aaj

hum ek subh-e-daraKHshan ko ab taraste hain

andhere teri fazaon ke hum ko Daste hain

koi to aae jo hum ko jagae ghaflat se

ki hum bhi uTh ke sanwaren tujhe mohabbat se

tere wajud ne jaise hamein sanwara hai

tere KHulus ne jaise hamein nikhaara hai