wentilator par paDi mohabbat

tujh ko batāyā bhī thā ki mohabbat

nanhe bachchoñ kī hañsī se bahut muḳhtalif hai magar

tū ne nadī meñ maujūd machhliyoñ se

paanī kī 'azmat ke qisse sune aur

mohabbat karne kī Thaan lī

kaash tab tumheñ 'ilm hotā

ullū ko ābādiyoñ se nafrat kyoñ huī

ḳhudā ne hameñ mohabbat kī devī se

bachāne ke liye parindoñ ko ḳhat de kar

hamārī taraf bhejā magar

unheñ un tīr-andāzoñ ne maar Daalā jo abhī

jang haar kar apne gaañv lauT rahe the

nadī kināre baiThe do premī ik dūsre ko

chūmte to rahe magar ik dūsre ko batā na sake

ki mohabbat kis parinde kā naam hai

zamīn par ḳhudā ke muqarrar-karda

farishtoñ ne mohabbat karne kā sochā to unheñ

samundaroñ meñ zam kar diyā gayā

mohabbat kahne ko lafz hai magar

jise tum na samjhe vo ehsās thā

ka.ī sadiyoñ se mohabbat kā safar kartā

maiñ aaj usī jagah huuñ jahāñ se chalā thā

ka.ī baras se mere ghar ke darvāze

terī dastak ke liye taras rahe haiñ

aur un ko bhī kisī kī yaad kī dīmak

andar se khaa.e jā rahī hai

merī jaañ hijr meñ intizār

koī āsāñ baat to nahīñ

tere jaane ko aaj

pāñch baras mukammal hone ko haiñ

magar terī chūḌiyoñ kī khanak aaj tak

mere kānoñ meñ guuñj rahī hai

terī hijrat ke baa'd mujhe ehsās huā

ki bārish kī āvāz meñ bhī ik mausīqī hai

jise sun kar logoñ ne mohabbat karnā sīkhā

maiñ ne chāhā thā ki hamāre darmiyāñ ik āḳhirī mulāqāt hotī jahāñ ham

lafzoñ kī jagah ik dūsre kī ḳhāmoshī ko samajhte

magar is mulāqāt meñ āThveñ barr-e-āzam se aa.e

kuchh anjān log rukāvaT bane

jo yūnānī ḳhudāoñ kī nā-jā.ez aulād the

tum nahīñ jāntī tumhārī hijrat ke baa'd

kitne charāġhoñ ne zahr ke pyāle nosh kiye

kitne parindoñ ne gaañv chhoḌ diyā

kitne pahāḌoñ ko nadiyoñ ne apnī āġhosh meñ le liyā

kitnī titliyoñ ne apne rang ḳhudā ke canvas ko tohfa kar diye

to kisī ne terī āvāz sunñe ke liye

shahroñ ke shor ko chhoḌ kar

jangaloñ meñ baserā kar liyā

terī hijrat ke baa'd maiñ ne ḳhudā se

baġhāvat kā sochā to ḳhayāl aaya

ki tū bhī usī kī taḳhlīq hai

maiñ ne vīrān shāh-rāhoñ pe reñgtī ḳhāmoshī meñ

terī hijrat kā dukh dekhā

maiñ ne biis hazār saal purāne khañDarāt kī

dīvār par terā naam likhā huā paḌhā to mahsūs huā

tū to guzishta sadiyoñ se logoñ kā armāñ rahā

maiñ ne sau-sāla purāne bargad ke peḌ se

terī mohabbat ke qisse sune to patā chalā

ki ḳhalā-bāz chāñd par zindagī kī

talāsh meñ kyoñ haiñ

maiñ ne purāne shā'iroñ kī nazmoñ meñ

terī hijrat kā dukh mahsūs kiyā

maiñ ne dargāhoñ ke bāhar baiThe faqīroñ ke chehroñ par

terī hijrat kā ġham dekhā hai

kitne daraḳht terī talab kī mannat ke dhāgoñ se bhar ga.e

aur zamīñ ne unheñ apnī āġhosh meñ le liyā

zalzaloñ se bosīda gharoñ ke malboñ se

milne vaale ḳhutūt meñ

maiñ ne tere liye mohabbat-bhare jumle dekhe

maiñ ne yūnānī ḳhudāoñ kī kitāboñ meñ tere qisse paḌhe

to mahsūs huā terī mohabbat kī dāstāñ meñ

merā kirdār ek tissue paper se ziyāda na thā

chunāñche maiñ ne apnī bīnā.ī ullū ko tohfa kī

apnī lāchār mohabbat ko ventilator par chhoḌā

aur jangal kā ruḳh kar liyā

tujh ko bataya bhi tha ki mohabbat

nanhe bachchon ki hansi se bahut muKHtalif hai magar

tu ne nadi mein maujud machhliyon se

pani ki 'azmat ke qisse sune aur

mohabbat karne ki Than li

kash tab tumhein 'ilm hota

ullu ko aabaadiyon se nafrat kyon hui

KHuda ne hamein mohabbat ki dewi se

bachane ke liye parindon ko KHat de kar

hamari taraf bheja magar

unhen un tir-andazon ne mar Dala jo abhi

jang haar kar apne ganw lauT rahe the

nadi kinare baiThe do premi ek dusre ko

chumte to rahe magar ek dusre ko bata na sake

ki mohabbat kis parinde ka nam hai

zamin par KHuda ke muqarrar-karda

farishton ne mohabbat karne ka socha to unhen

samundaron mein zam kar diya gaya

mohabbat kahne ko lafz hai magar

jise tum na samjhe wo ehsas tha

kai sadiyon se mohabbat ka safar karta

main aaj usi jagah hun jahan se chala tha

kai baras se mere ghar ke darwaze

teri dastak ke liye taras rahe hain

aur un ko bhi kisi ki yaad ki dimak

andar se khae ja rahi hai

meri jaan hijr mein intizar

koi aasan baat to nahin

tere jaane ko aaj

panch baras mukammal hone ko hain

magar teri chuDiyon ki khanak aaj tak

mere kanon mein gunj rahi hai

teri hijrat ke ba'd mujhe ehsas hua

ki barish ki aawaz mein bhi ek mausiqi hai

jise sun kar logon ne mohabbat karna sikha

main ne chaha tha ki hamare darmiyan ek aaKHiri mulaqat hoti jahan hum

lafzon ki jagah ek dusre ki KHamoshi ko samajhte

magar is mulaqat mein aaThwen barr-e-azam se aae

kuchh anjaan log rukawaT bane

jo yunani KHudaon ki na-jaez aulad the

tum nahin jaanti tumhaari hijrat ke ba'd

kitne charaghon ne zahr ke pyale nosh kiye

kitne parindon ne ganw chhoD diya

kitne pahaDon ko nadiyon ne apni aaghosh mein le liya

kitni titliyon ne apne rang KHuda ke canwas ko tohfa kar diye

to kisi ne teri aawaz sunne ke liye

shahron ke shor ko chhoD kar

jangalon mein basera kar liya

teri hijrat ke ba'd main ne KHuda se

baghawat ka socha to KHayal aaya

ki tu bhi usi ki taKHliq hai

main ne viran shah-rahon pe rengti KHamoshi mein

teri hijrat ka dukh dekha

main ne bis hazar sal purane khanDaraat ki

diwar par tera nam likha hua paDha to mahsus hua

tu to guzishta sadiyon se logon ka arman raha

main ne sau-sala purane bargad ke peD se

teri mohabbat ke qisse sune to pata chala

ki KHala-baz chand par zindagi ki

talash mein kyon hain

main ne purane sha'iron ki nazmon mein

teri hijrat ka dukh mahsus kiya

main ne dargahon ke bahar baiThe faqiron ke chehron par

teri hijrat ka gham dekha hai

kitne daraKHt teri talab ki mannat ke dhagon se bhar gae

aur zamin ne unhen apni aaghosh mein le liya

zalzalon se bosida gharon ke malbon se

milne wale KHutut mein

main ne tere liye mohabbat-bhare jumle dekhe

main ne yunani KHudaon ki kitabon mein tere qisse paDhe

to mahsus hua teri mohabbat ki dastan mein

mera kirdar ek tissue paper se ziyaada na tha

chunanche main ne apni binai ullu ko tohfa ki

apni lachaar mohabbat ko wentilator par chhoDa

aur jangal ka ruKH kar liya