widaa

tez aur tund nigāhoñ se guzarnā hogā

dard se ashk se aahoñ se guzarnā hogā

saḳht pur-pech do-rāhoñ se guzarnā hogā

is kaThin raah ko apnā bhī sakegī ki nahīñ

jā rahī hai vo magar jā bhī sakegī ki nahīñ

tere anvār ke shaidā.ī ko is dil se ġharaz

rahzan-e-husn ko is ishq kī manzil se ġharaz

ḳhūgar-e-ḳhalvat-e-rangīn ko mahfil se ġharaz

is ġharaz-mand ko samjhā bhī sakegī ki nahīñ

jā rahī hai vo magar jā bhī sakegī ki nahīñ

sīm-o-zar atlas-o-dībā kā payām aaya hai

ek mahrūm-e-tamannā ko salām aaya hai

zindagī jis se bahak jaa.e vo jaam aaya hai

aap apne meñ vahāñ aa bhī sakegī ki nahīñ

jā rahī hai vo magar jā bhī sakegī ki nahīñ

sho.ala-e-husn thā muḳhtas mirī mahfil ke liye

bahr meñ thā jo tamavvuj mire sāhil ke liye

vo tarannum ki jo thā vaqf mire dil ke liye

haañ vahī naġhma vahāñ gā bhī sakegī ki nahīñ

jā rahī hai vo magar jā bhī sakegī ki nahīñ

muskurātā sā zamāna use yaad aa.egā

apnī ulfat kā fasāna use yaad aa.egā

ek bechain divāna use yaad aa.egā

apne mahbūb ko Thukrā bhī sakegī ki nahīñ

jā rahī hai vo magar jā bhī sakegī ki nahīñ

mujh ko Dar hai tire aañsū na Dhalak jaa.eñ kahīñ

josh-e-sahbā se na ye jaam chhalak jaa.eñ kahīñ

paañv is raah meñ tere na bahak jaa.eñ kahīñ

zulf-e-āvāra ko suljhā bhī sakegī ki nahīñ

jā rahī hai vo magar jā bhī sakegī ki nahīñ

tez aur tund nigahon se guzarna hoga

dard se ashk se aahon se guzarna hoga

saKHt pur-pech do-rahon se guzarna hoga

is kaThin rah ko apna bhi sakegi ki nahin

ja rahi hai wo magar ja bhi sakegi ki nahin

tere anwar ke shaidai ko is dil se gharaz

rahzan-e-husn ko is ishq ki manzil se gharaz

KHugar-e-KHalwat-e-rangin ko mahfil se gharaz

is gharaz-mand ko samjha bhi sakegi ki nahin

ja rahi hai wo magar ja bhi sakegi ki nahin

sim-o-zar atlas-o-diba ka payam aaya hai

ek mahrum-e-tamanna ko salam aaya hai

zindagi jis se bahak jae wo jam aaya hai

aap apne mein wahan aa bhi sakegi ki nahin

ja rahi hai wo magar ja bhi sakegi ki nahin

shoala-e-husn tha muKHtas meri mahfil ke liye

bahr mein tha jo tamawwuj mere sahil ke liye

wo tarannum ki jo tha waqf mere dil ke liye

han wahi naghma wahan ga bhi sakegi ki nahin

ja rahi hai wo magar ja bhi sakegi ki nahin

muskuraata sa zamana use yaad aaega

apni ulfat ka fasana use yaad aaega

ek bechain diwana use yaad aaega

apne mahbub ko Thukra bhi sakegi ki nahin

ja rahi hai wo magar ja bhi sakegi ki nahin

mujh ko Dar hai tere aansu na Dhalak jaen kahin

josh-e-sahba se na ye jam chhalak jaen kahin

panw is rah mein tere na bahak jaen kahin

zulf-e-awara ko suljha bhi sakegi ki nahin

ja rahi hai wo magar ja bhi sakegi ki nahin