wirsa

biis sadiyoñ hayūlā ho tum

biis sadiyoñ kā pur-asrār hayūlā jis par

sirf be-dard havāoñ ne zabāñ pherī thī

ab mirā haath hai aur haath kī ye zinda harārat shāyad

tum ko mahsūs ho badle hue mausam kī tarah

tum ye samjho ki kisī dhuup ke TukḌe ne tumheñ

roz kī tarah se phir chheḌā hai

yā thakā-māñda parinda hai jo aa baiThā hai

is bulandī se na dekho ki mire haath bhī pathrā jaa.eñ

jhurjhurī le ke ragoñ kī shāḳheñ

ek lamhe ke liye jaag uThīñ

lahlahāne lagīñ jaise phir se

juḌ ga.ī hoñ vo prāchīn jaḌoñ se apnī

aap apne meñ utartī huī

chup-chāp guphāoñ meñ ghane peḌ tale

khojtā rahtā huuñ batlāo kahāñ kho ga.e

uñglī kā ishāra pā kar

ulTī phirtī huī chakrī kī tarah ye duniyā

band āñkhoñ meñ simaT aatī hai

roz har sub.h kā aḳhbār jatātā hai ki is dhartī par

saare dar band hue

haath ākāsh ke rātoñ ko na utreñge kabhī

koī sachchā.ī ke dukh bāñTne vaalā bhī nahīñ

ġhaar kī aañkh se dekho mujh ko

apne kāñdhe pe uThā.e hue betāl kī laash

lauT aayā huuñ sambhālo ye virāsat apnī

maiñ thakā-māñda parinda hī sahī

dhaan ke khet meñ bhaj-kāg kī mānind khaḌe ho tum bhī

chiḌiyāñ be-vaj.h saham jaatī haiñ aur bhūkī hī palaT aatī haiñ

chiḌiyāñ zinda haiñ ki bhaj-kāg

koī kyā jaane

bis sadiyon hayula ho tum

bis sadiyon ka pur-asrar hayula jis par

sirf be-dard hawaon ne zaban pheri thi

ab mera hath hai aur hath ki ye zinda hararat shayad

tum ko mahsus ho badle hue mausam ki tarah

tum ye samjho ki kisi dhup ke TukDe ne tumhein

roz ki tarah se phir chheDa hai

ya thaka-manda parinda hai jo aa baiTha hai

is bulandi se na dekho ki mere hath bhi pathra jaen

jhurjhuri le ke ragon ki shaKHen

ek lamhe ke liye jag uThin

lahlahane lagin jaise phir se

juD gai hon wo prachin jaDon se apni

aap apne mein utarti hui

chup-chap guphaon mein ghane peD tale

khojta rahta hun batlao kahan kho gae

ungli ka ishaara pa kar

ulTi phirti hui chakri ki tarah ye duniya

band aankhon mein simaT aati hai

roz har subh ka aKHbar jatata hai ki is dharti par

sare dar band hue

hath aakash ke raaton ko na utrenge kabhi

koi sachchai ke dukh banTne wala bhi nahin

ghaar ki aankh se dekho mujh ko

apne kandhe pe uThae hue betal ki lash

lauT aaya hun sambhaalo ye wirasat apni

main thaka-manda parinda hi sahi

dhan ke khet mein bhaj-kag ki manind khaDe ho tum bhi

chiDiyan be-wajh saham jati hain aur bhuki hi palaT aati hain

chiDiyan zinda hain ki bhaj-kag

koi kya jaane