wirsa

muḌ kar pīchhe dekh rahī huuñ

kyā kyā kuchh virse meñ milā thā

aur kyā kuchh maiñ chhoḌ rahī huuñ

merā ghar tūfān-zada thā

mere buzurgoñ ne dekhā thā

vo ifrīt-e-vaqt ki jis ne

un se sab kuchh chhīn liyā thā

phir bhī kyā kuchh mujh ko milā thā

chehroñ par mehnat kī chamak thī

āñkhoñ meñ ġhairat kī damak thī

haath meñ haath dhare the kaise

ḳhālī haath bhare the kaise

mil-jul kar rahne kī ravish thī

zinda rahne kī ḳhvāhish thī

ye sab kuchh us ghar se milā thā

vo ghar jo ik ḳhālī ghar thā

maiñ ne ek bhare kumbe meñ

apne hañste-baste ghar meñ

ḳhauf kā virsa chhoḌ diyā hai

rishta-e-jur.at toḌ diyā hai

lahjoñ meñ lafzoñ kī bachat hai

qurbat meñ kitnī vahshat hai

apnī ḳhushiyāñ apne āñgan

apne khilaune apne dāman

muḌ kar pīchhe dekh rahī huuñ

kyā kyā kuchh virsa meñ milā thā

aur kyā kuchh maiñ chhoḌ rahī huuñ

muD kar pichhe dekh rahi hun

kya kya kuchh wirse mein mila tha

aur kya kuchh main chhoD rahi hun

mera ghar tufan-zada tha

mere buzurgon ne dekha tha

wo ifrit-e-waqt ki jis ne

un se sab kuchh chhin liya tha

phir bhi kya kuchh mujh ko mila tha

chehron par mehnat ki chamak thi

aankhon mein ghairat ki damak thi

hath mein hath dhare the kaise

KHali hath bhare the kaise

mil-jul kar rahne ki rawish thi

zinda rahne ki KHwahish thi

ye sab kuchh us ghar se mila tha

wo ghar jo ek KHali ghar tha

main ne ek bhare kumbe mein

apne hanste-baste ghar mein

KHauf ka wirsa chhoD diya hai

rishta-e-jurat toD diya hai

lahjon mein lafzon ki bachat hai

qurbat mein kitni wahshat hai

apni KHushiyan apne aangan

apne khilaune apne daman

muD kar pichhe dekh rahi hun

kya kya kuchh wirsa mein mila tha

aur kya kuchh main chhoD rahi hun