visal

suno

merī mohabbat koī maut nahīñ

jis kā zā.iqa chakhnā tum par lāzim ho

merī mohabbat to āshiqoñ ke shamshān ghaaT par

ugā vo sāya-dār peḌ hai

jis kī Dāloñ par ajnabī parinde apnā ghar banāte haiñ

aur jis kī jaḌoñ meñ mere ham-nafas

apnī vahshatoñ kī jhulastī raakh Dālte haiñ

tum jo mere ham-zād ho

tumhāre liye to merī mohabbat zindagī hai

jis meñ mānind-e-gulzār taḳhlīq kā har pahlū

tumhārā intizārī rahtā hai

tum jo mere ham-raqs ho

tum kyoñ apne mehvar se dast-bardār hote ho

ki tumhāre aisā karne se

mere nizām-e-shaḳhsī kā tavāzun bigaḌne lagtā hai

aur bigaḌte zāviyoñ se jo manzar

merī āñkheñ dekhtī haiñ

us meñ isrāfīl apne narsinghe kī samt durust kartā hai

aur izrā.īl ek azm-e-azīm se apne par tolne lagtā hai

be-shak kullu nafsin zā.iqat-ul-maut

kullu nafsin zā.iqat-ul-maut

magar merī mohabbat koī maut nahīñ

jis kā zā.iqa chakhnā tum par lāzim ho

suno

meri mohabbat koi maut nahin

jis ka zaiqa chakhna tum par lazim ho

meri mohabbat to aashiqon ke shamshan ghaT par

uga wo saya-dar peD hai

jis ki Dalon par ajnabi parinde apna ghar banate hain

aur jis ki jaDon mein mere ham-nafas

apni wahshaton ki jhulasti rakh Dalte hain

tum jo mere ham-zad ho

tumhaare liye to meri mohabbat zindagi hai

jis mein manind-e-gulzar taKHliq ka har pahlu

tumhaara intizari rahta hai

tum jo mere ham-raqs ho

tum kyon apne mehwar se dast-bardar hote ho

ki tumhaare aisa karne se

mere nizam-e-shaKHsi ka tawazun bigaDne lagta hai

aur bigaDte zawiyon se jo manzar

meri aankhen dekhti hain

us mein israfil apne narsinghe ki samt durust karta hai

aur izrail ek azm-e-azim se apne par tolne lagta hai

be-shak kullu nafsin zaiqat-ul-maut

kullu nafsin zaiqat-ul-maut

magar meri mohabbat koi maut nahin

jis ka zaiqa chakhna tum par lazim ho