wo abhi apne chehre mein utra nahin

kis se pūchhūñ vo kyā

shaḳhs hai jo mirī

aarzū ke jharokoñ meñ Thahre hue

saare chehroñ meñ bikhrā huā hai magar

ḳhud abhī apne chehre meñ utrā nahīñ

kis se pūchhūñ vo kyā

naam hai jo mirī

dhaḌkanoñ ke muqaddar meñ marqūm hai

aur vo kyā ajnabī hai jo sadiyoñ se mere ḳhayāloñ ke qarye meñ ābād hai

magar merā sūrat-shanāsā nahīñ

kis kī āvāz hai!

jo mirī ruuh meñ naġhma-parvāz hai

kaun batlā.egā us nagar kā pata

jis kī miTTī kī ḳhushbū mire jism ke vāste durj hai,

jis ke dīvār-o-dar merī be-ḳhvāb āñkhoñ se mānūs haiñ

aur jis ko kabhī maiñ ne dekhā nahīñ

nā-rasā.ī mirī nā-rasā.ī mirī!

jis ko paayā na thā us ko khone kā ġham

merī ḳhvāhish ke siine kā nāsūr hai

kis ko āvāz duuñ kis kā mātam karūñ

vo abhī apne chehre meñ utrā nahīñ

kis se pūchhūñ mirā mudda.ā kaun hai!

nā-rasā kaun hai!

kis se puchhun wo kya

shaKHs hai jo meri

aarzu ke jharokon mein Thahre hue

sare chehron mein bikhra hua hai magar

KHud abhi apne chehre mein utra nahin

kis se puchhun wo kya

nam hai jo meri

dhaDkanon ke muqaddar mein marqum hai

aur wo kya ajnabi hai jo sadiyon se mere KHayalon ke qarye mein aabaad hai

magar mera surat-shanasa nahin

kis ki aawaz hai!

jo meri ruh mein naghma-parwaz hai

kaun batlaega us nagar ka pata

jis ki miTTi ki KHushbu mere jism ke waste durj hai,

jis ke diwar-o-dar meri be-KHwab aankhon se manus hain

aur jis ko kabhi main ne dekha nahin

na-rasai meri na-rasai miri!

jis ko paya na tha us ko khone ka gham

meri KHwahish ke sine ka nasur hai

kis ko aawaz dun kis ka matam karun

wo abhi apne chehre mein utra nahin

kis se puchhun mera muddaa kaun hai!

na-rasa kaun hai!