wo kyun aaya

sabā ke sabz ḳhitte se

sunahre mausamoñ kī aarzū le kar

dayār-e-jāñ meñ kyuuñ aayā

vo jis kī aañkh chamkīle dinoñ kā khoj detī hai

jahāñ rañgoñ kī dhun meñ āshnā manzar tahayyur ke

khulī ḳhvāhish ke paanī meñ

ubharte tairte haiñ Duub jaate haiñ

vo mujh se pūchhtā hai saiñkaḌoñ asrār jiine aur marne ke

nazar kā raushnī se rābta kyā hai

lahū ko chāñdnī se kyā ta.alluq hai

fazā kī god meñ dam toḌtī qaus-e-quzah kyuuñ hai

bichhaḌnā yaad rakhnā bhuul jaanā kis ko kahte haiñ

matā-e-hastī-e-be-ḳhānumāñ kyā hai

zamīñ kyā hai zamāñ kyā hai

magar maiñ lafz-gar hoñ kaise samjhā.ūñ

ki mere tajarbe kī vus.atoñ meñ bhī

sabā ke sabz ḳhitte se mire sukh kī qalam-rau tak

tahayyur kā ilāqa hai

jahāñ niile gharoñdoñ se

savāloñ ke parinde mā.il-e-parvāz rahte haiñ

gumāñ kī sar-zamīnoñ ko

sabā ke sabz ḳhitte ko

nazar ke bādbānoñ se

khulī ḳhvāhish ke paanī tak

parinde hairatoñ kī taaza manzil kā ishāra haiñ

parinde āgahī kā isti.āra haiñ

saba ke sabz KHitte se

sunahre mausamon ki aarzu le kar

dayar-e-jaan mein kyun aaya

wo jis ki aankh chamkile dinon ka khoj deti hai

jahan rangon ki dhun mein aashna manzar tahayyur ke

khuli KHwahish ke pani mein

ubharte tairte hain Dub jate hain

wo mujh se puchhta hai sainkaDon asrar jine aur marne ke

nazar ka raushni se rabta kya hai

lahu ko chandni se kya talluq hai

faza ki god mein dam toDti qaus-e-quzah kyun hai

bichhaDna yaad rakhna bhul jaana kis ko kahte hain

mata-e-hasti-e-be-KHanuman kya hai

zamin kya hai zaman kya hai

magar main lafz-gar hon kaise samjhaun

ki mere tajarbe ki wusaton mein bhi

saba ke sabz KHitte se mere sukh ki qalam-rau tak

tahayyur ka ilaqa hai

jahan nile gharondon se

sawalon ke parinde mail-e-parwaz rahte hain

guman ki sar-zaminon ko

saba ke sabz KHitte ko

nazar ke baadbanon se

khuli KHwahish ke pani tak

parinde hairaton ki taza manzil ka ishaara hain

parinde aagahi ka istiara hain