wo meri pahli mohabbat thi

jis kī āvāz kānoñ meñ sub.h sub.h chiḌiyoñ kī tarah chahaktī thī

jis kī maujūdgī se fazāoñ meñ ḳhushbū sī mahaktī thī

vo merī pahlī mohabbat thī

jis kī āñkheñ dekh muta.assir ho jaate the hiran

naqāb se jis kā chehra aise jhalaktā thā jaise sūraj kī pahlī kiran

jis kā muskurānā thā ki jaise vādiyoñ meñ sahar kā aanā

kisī phuul kī tarah jis pe titliyāñ mañDrāyā kartī thiiñ

vo chāñd se aa.ī thī shāyad raat meñ sitāroñ se bāteñ kiyā kartī thī

jo din kā pahlā paiġhām bhī thī aur raat kā āḳhirī salām bhī

sub.h-bā-ḳhair se le kar shab-ba-ḳhair tak jo merā takiya-kalām thī

vo merī pahlī mohabbat thī

ḳhāmoshī meñ chhupā.e jazbāt jo samajh letī thī

bin zāhir kiye tamām ehsāsāt jo parakh letī thī

mere liye jo har kahānī har ek qisse meñ thī

har ek shā.irī har ek ġhazal ke hisse meñ thī

jo har nazm meñ thī aur har mausīqī meñ bhī

dildār bhī thī jo aur duniyā-dār bhī

shān-o-shaukat kī is duniyā meñ mujh ġharīb kī chāhat kī talabgār thī

vo merī pahlī mohabbat thī

jo maazī thī magar merā mustaqbil na ban paa.ī

mere saath har haal meñ raazī thī magar zindagī meñ shāmil na ho paa.ī

pyaar kī raah meñ jo merī ham-safar thī

jis ke jaane ke baad merī zindagī sifar thī

kuchh rishte ḳhuun ke hote haiñ aur kuchh dil ke

magar ruuh kā rishta sirf jis shaḳhs se thā

vo merī pahlī mohabbat thī

mere taḳhayyul meñ jo ik tasvīr ban ke rah ga.ī

jo dil meñ mere bas ke taqdīr meñ kisī aur kī ho ga.ī

jo hamrāz bhī thī aur merī zindagī kā sab se baḌā raaz bhī

jis ke jaane ke muddatoñ baad bhī us ke vāpas aane kī ek aas thī

vo merī pahlī mohabbat thī

vo merī pahlī mohabbat thī

jis ki aawaz kanon mein subh subh chiDiyon ki tarah chahakti thi

jis ki maujudgi se fazaon mein KHushbu si mahakti thi

wo meri pahli mohabbat thi

jis ki aankhen dekh mutassir ho jate the hiran

naqab se jis ka chehra aise jhalakta tha jaise suraj ki pahli kiran

jis ka muskurana tha ki jaise wadiyon mein sahar ka aana

kisi phul ki tarah jis pe titliyan manDraya karti thin

wo chand se aai thi shayad raat mein sitaron se baaten kiya karti thi

jo din ka pahla paigham bhi thi aur raat ka aaKHiri salam bhi

subh-ba-KHair se le kar shab-ba-KHair tak jo mera takiya-kalam thi

wo meri pahli mohabbat thi

KHamoshi mein chhupae jazbaat jo samajh leti thi

bin zahir kiye tamam ehsasat jo parakh leti thi

mere liye jo har kahani har ek qisse mein thi

har ek shairi har ek ghazal ke hisse mein thi

jo har nazm mein thi aur har mausiqi mein bhi

dildar bhi thi jo aur duniya-dar bhi

shan-o-shaukat ki is duniya mein mujh gharib ki chahat ki talabgar thi

wo meri pahli mohabbat thi

jo mazi thi magar mera mustaqbil na ban pai

mere sath har haal mein raazi thi magar zindagi mein shamil na ho pai

pyar ki rah mein jo meri ham-safar thi

jis ke jaane ke baad meri zindagi sifar thi

kuchh rishte KHun ke hote hain aur kuchh dil ke

magar ruh ka rishta sirf jis shaKHs se tha

wo meri pahli mohabbat thi

mere taKHayyul mein jo ek taswir ban ke rah gai

jo dil mein mere bas ke taqdir mein kisi aur ki ho gai

jo hamraaz bhi thi aur meri zindagi ka sab se baDa raaz bhi

jis ke jaane ke muddaton baad bhi us ke wapas aane ki ek aas thi

wo meri pahli mohabbat thi

wo meri pahli mohabbat thi