wote dijiye

aa.e haiñ ham bhā.iyo muzhda sunāne ke liye

aap ke hālāt ko behtar banāne ke liye

aap pūchheñge kahāñ ġhā.eb rahe ham pāñch saal

kyā batā.eñ aap kī furqat meñ thā kyā apnā haal

kyā batā.eñ kis qadar TuuTe pahāḌ ālām ke

aah ham maare hue haiñ gardish-e-ayyām ke

aap hī ke ġham meñ ghulte ghulte moTe ham hue

pāñch barsoñ meñ ye Dheroñ ġham na lekin kam hue

is liye aa.e haiñ phir tigḌam laḌāne ke liye

sabz baaġh ik baar phir sab ko dikhāne ke liye

aa gayā phir ik nayā daur-e-election aa gayā

dostoñ kā dost aur dushman kā dushman aa gayā

vote de kar phir banā.eñ aap ham ko kāmyāb

taaki kāñTe aap ko deñ aur ḳhud chun leñ gulāb

vaqt ke maare hue kursī se sarkā.e hue

aap ke dar par haiñ aa.e haath phailā.e hue

ham ne maanā tā-kamar Duube hue kīchaḌ meñ haiñ

bheḌiyā samjheñ na ham ko aap ke revaḌ meñ haiñ

shar pe ab maa.il nahīñ haiñ aap ke ġham-ḳhvār haiñ

qaum kī kashtī kī ik TuuTī huī patvār haiñ

daa.eñ baa.eñ chamche apne aage pīchhe car hai

de diyā gar vote to phir apnā beḌā paar hai

vote diije vote diije vote hī darkār hai

tanz kartā hai kare 'asrār' nā-hanjār hai

aae hain hum bhaiyo muzhda sunane ke liye

aap ke haalat ko behtar banane ke liye

aap puchhenge kahan ghaeb rahe hum panch sal

kya bataen aap ki furqat mein tha kya apna haal

kya bataen kis qadar TuTe pahaD aalam ke

aah hum mare hue hain gardish-e-ayyam ke

aap hi ke gham mein ghulte ghulte moTe hum hue

panch barson mein ye Dheron gham na lekin kam hue

is liye aae hain phir tigDam laDane ke liye

sabz bagh ek bar phir sab ko dikhane ke liye

aa gaya phir ek naya daur-e-election aa gaya

doston ka dost aur dushman ka dushman aa gaya

wote de kar phir banaen aap hum ko kaamyab

taki kanTe aap ko den aur KHud chun len gulab

waqt ke mare hue kursi se sarkae hue

aap ke dar par hain aae hath phailae hue

hum ne mana ta-kamar Dube hue kichaD mein hain

bheDiya samjhen na hum ko aap ke rewaD mein hain

shar pe ab mail nahin hain aap ke gham-KHwar hain

qaum ki kashti ki ek TuTi hui patwar hain

daen baen chamche apne aage pichhe car hai

de diya gar wote to phir apna beDa par hai

wote dije wote dije wote hi darkar hai

tanz karta hai kare 'asrar' na-hanjar hai