yaad hai

ham ko ab tak apne bachpan kā zamānā yaad hai

dostoñ ke saath bārish meñ nahānā yaad hai

yaad hai vo jhūmnā vo nāchnā vo kūdnā

vo lapaknā aur vo paanī uḌānā yaad hai

be-tahāsha bhīgnā be-fikr ho kar khelnā

aur phir sardī ke maare kapkapānā yaad hai

bhiig kar bīmār paḌnā aur bistar meñ paḌe

chupke chupke raat din aañsū bahānā yaad hai

bhāgnā rañgoñ ke pīchhe ghaas ke maidān meñ

titliyoñ ke shauq meñ vo maar khānā yaad hai

dhuup kī mānind hai ye zindagī 'tāriq' mujhe

dhuup ke dālān meñ vo aanā jaanā yaad hai

hum ko ab tak apne bachpan ka zamana yaad hai

doston ke sath barish mein nahana yaad hai

yaad hai wo jhumna wo nachna wo kudna

wo lapakna aur wo pani uDana yaad hai

be-tahasha bhigna be-fikr ho kar khelna

aur phir sardi ke mare kapkapana yaad hai

bhig kar bimar paDna aur bistar mein paDe

chupke chupke raat din aansu bahana yaad hai

bhagna rangon ke pichhe ghas ke maidan mein

titliyon ke shauq mein wo mar khana yaad hai

dhup ki manind hai ye zindagi 'tariq' mujhe

dhup ke dalan mein wo aana jaana yaad hai