yaaden

chhoTe chhoTe tyauhāroñ kī kaisī ḳhushiyāñ thiiñ

ham phuljhaḌiyāñ le kar sahn meñ bhāge phirte the

shab-e-barāt pe maiñ ne bhī māñgī thī ek duā

us ke hoñToñ par bhī kitne harf sunahre the

garmī kī taptī do-pahreñ aur pīpal kā peḌ

merī dukhtī āñkhoñ meñ sukh chain utarte the

ik jaisī be maqsad socheñ ik jaise hañgām

umr ke ik hisse meñ 'farhat' ham bhī laḌke the

chhoTe chhoTe tyauhaaron ki kaisi KHushiyan thin

hum phuljhaDiyan le kar sahn mein bhage phirte the

shab-e-baraat pe main ne bhi mangi thi ek dua

us ke honTon par bhi kitne harf sunahre the

garmi ki tapti do-pahren aur pipal ka peD

meri dukhti aankhon mein sukh chain utarte the

ek jaisi be maqsad sochen ek jaise hangam

umr ke ek hisse mein 'farhat' hum bhi laDke the