yahi sab kuchh hai

yahī sab kuchh hai

agar Thahrī huī gahrī nazar se dekho

be-sabab aañkh se bahtī huī ashkoñ kī qatār

kapkapāte hue hoñToñ kā sukūt

jism ke tund mah-o-sāl

zamāne kī jhulastī huī dopahar meñ saa.e ke sulagte andām

saañs kī lahr se larzā huā zulfoñ kā hisār

raqs kartī huī ḳhvāhish se chhalakte hue zard ayyām

tamām

maan lete haiñ ki ye vaqt badalte lahje

ab bhī e.ajāz dikhā sakte haiñ

ye masīhā.ī kā jhuriyoñ bharā chehrā ab bhī

muskurāhaT ke liye tāzgī chun saktā hai

ye guzishta kā fusūñ-baḳht havāle ab bhī

vaqt kī nabz thamā sakte haiñ

lekin aisā hai ki jab dhaḌkaneñ ghuñghrū ban jaa.eñ

ḳhvāhisheñ raqs kiyā kartī haiñ sukūñ kī jhanak boltī hai

thartharāte hue jismoñ se havāsoñ kā dhuāñ uThtā hai

ishtihā aag janā kartī hai

bhuuk ifrīt hai

vahshat hai baḌī aafat hai

bhuuk ḳhamyāza-e-jān-o-tan hai

be-par-o-bāl kiyā kartī hai

vaqt kī taal ko be-tāl kiyā kartī hai

bhuuk a.asāb-e-shikasta kī khulī bai.at hai

ye ḳhad-o-ḳhāl kuchal detī hai

tahzīb ke reshoñ ko masal detī hai

aur sarmāya-parastī ke sunahre ayyām

gird-e-ruḳhsār shab-o-roz pe mil jaate haiñ

sīna-e-ḳhāk ko dahlātā huā sūr-e-falak

mutma.in ḳhāk-nashīnoñ ke liye

roz hī roz viġhā laatā hai

aur shab-o-roz mah-o-sāl meñ Dhal jaate haiñ

yahī sab kuchh hai agar Thahrī hui gahrī nazar se dekho

surḳhī-e-chashm kahīñ pahlū-e-be-tāb kahīñ

be-karāñ bāheñ kahīñ

lams kahīñ

ḳhvāb kahīñ

lahariyā pardoñ se chhantī hui shāmoñ kā nasha

jism sahlātī hui raat kā nam

besh na kam

yahi sab kuchh hai

agar Thahri hui gahri nazar se dekho

be-sabab aankh se bahti hui ashkon ki qatar

kapkapate hue honTon ka sukut

jism ke tund mah-o-sal

zamane ki jhulasti hui dopahar mein sae ke sulagte andam

sans ki lahr se larza hua zulfon ka hisar

raqs karti hui KHwahish se chhalakte hue zard ayyam

tamam

man lete hain ki ye waqt badalte lahje

ab bhi eajaz dikha sakte hain

ye masihai ka jhuriyon bhara chehra ab bhi

muskurahaT ke liye tazgi chun sakta hai

ye guzishta ka fusun-baKHt hawale ab bhi

waqt ki nabz thama sakte hain

lekin aisa hai ki jab dhaDkanen ghunghru ban jaen

KHwahishen raqs kiya karti hain sukun ki jhanak bolti hai

thartharaate hue jismon se hawason ka dhuan uThta hai

ishtiha aag jana karti hai

bhuk ifrit hai

wahshat hai baDi aafat hai

bhuk KHamyaza-e-jaan-o-tan hai

be-par-o-baal kiya karti hai

waqt ki tal ko be-tal kiya karti hai

bhuk aasab-e-shikasta ki khuli baiat hai

ye KHad-o-KHal kuchal deti hai

tahzib ke reshon ko masal deti hai

aur sarmaya-parasti ke sunahre ayyam

gird-e-ruKHsar shab-o-roz pe mil jate hain

sina-e-KHak ko dahlata hua sur-e-falak

mutmain KHak-nashinon ke liye

roz hi roz wigha lata hai

aur shab-o-roz mah-o-sal mein Dhal jate hain

yahi sab kuchh hai agar Thahri hui gahri nazar se dekho

surKHi-e-chashm kahin pahlu-e-be-tab kahin

be-karan bahen kahin

lams kahin

KHwab kahin

lahariya pardon se chhanti hui shamon ka nasha

jism sahlati hui raat ka nam

besh na kam