ye kaise log hain

ye kaise log haiñ jo sañg-basta jāliyoñ kī tarah āñkheñ band rakhte haiñ

sirhāne laḌkiyoñ ke raat kī bikhrī kitābeñ haiñ

aur un ke ḳhvāb añdheroñ ke darakte rauzanoñ se

dhaḌdhaḌātī billiyoñ kī tarah ghar ghar phail jaate haiñ

maiñ saarī raat āvāzoñ kā mub.ham shor suntā huuñ

aur āñkheñ band rakhtā huuñ

aur un ke saath ho letā huuñ jin kā rāsta merā muqaddar hai

so ab merī gavāhī kaun degā

ki maiñ apnī gavāhī ke liye zinda nahīñ huuñ

vo aise log the jo

dasht-e-be-dīvār meñ apne safar kā niiñd se āġhāz karte the

aur un kī uñgliyāñ sahrā.ī sāñpoñ kī tarah un ke badan par reñgtī thiiñ

aur un kī gardaneñ TuuTī kamānoñ kī tarah un ke badan par jhūltī thiiñ

vo apnī paT-khulī āñkhoñ se sote the

vo chalte the to un kī āstīneñ paañv meñ aatī thiiñ

aur vo ruk ke chalte the

daraḳhtoñ meñ kahīñ baiThā rupahlī rut kā kārinda

samundar samt kā qutbī sitāra hai

samundar merī āñkhoñ kā ishāra hai

use kahnā vo merī mez par apnī hathelī yuuñ jamā.e mujh ko mat dekhe

use kahnā sitāroñ aur un kī chaal meñ kuchh farq hotā hai

use kahnā vo apnī gardan-e-be-sāḳhta ke aa.ine meñ mujh ko mat dekhe

use kahnā vo apnī billiyoñ kī gardanoñ par haath rakh kar mujh ko mat dekhe

use kahnā mohabbat ik akelī naav hai

aur āsmāñ ā.īna-bardārī kā mujrim hai

ye kaise log hain jo sang-basta jaliyon ki tarah aankhen band rakhte hain

sirhane laDkiyon ke raat ki bikhri kitaben hain

aur un ke KHwab andheron ke darakte rauzanon se

dhaDdhaDati billiyon ki tarah ghar ghar phail jate hain

main sari raat aawazon ka mubham shor sunta hun

aur aankhen band rakhta hun

aur un ke sath ho leta hun jin ka rasta mera muqaddar hai

so ab meri gawahi kaun dega

ki main apni gawahi ke liye zinda nahin hun

wo aise log the jo

dasht-e-be-diwar mein apne safar ka nind se aaghaz karte the

aur un ki ungliyan sahrai sanpon ki tarah un ke badan par rengti thin

aur un ki gardanen TuTi kamanon ki tarah un ke badan par jhulti thin

wo apni paT-khuli aankhon se sote the

wo chalte the to un ki aastinen panw mein aati thin

aur wo ruk ke chalte the

daraKHton mein kahin baiTha rupahli rut ka karinda

samundar samt ka qutbi sitara hai

samundar meri aankhon ka ishaara hai

use kahna wo meri mez par apni hatheli yun jamae mujh ko mat dekhe

use kahna sitaron aur un ki chaal mein kuchh farq hota hai

use kahna wo apni gardan-e-be-saKHta ke aaine mein mujh ko mat dekhe

use kahna wo apni billiyon ki gardanon par hath rakh kar mujh ko mat dekhe

use kahna mohabbat ek akeli naw hai

aur aasman aaina-bardari ka mujrim hai