ye mujh mein kaun hai

ye mujh meñ kaun hai

ki jab bhī gardish-e-lahū ne

mere jism kī harārateñ

har ik rag-e-hayāt meñ utaar diiñ

to us kī ḳhud-kalāmiyoñ ne

niiñd kī siyāh chādareñ sameT liiñ

samā.atoñ kī rahguzar meñ

us kī guftugū ke qāfile ruke

to dasht-e-zindagī pe

abr kā ġhilāf aa gayā

sukūt-e-zindagī meñ jaise inqalāb aa gayā

maiñ us se pūchhtā rahā

ki kab talak ye marg-o-zīst kī musībateñ

firāq-o-vasl kī sa.ūbateñ

mire vajūd par raheñgī ḳhema-zan

magar mire savāl par

yā merī arz-e-hāl par

nuzūl-e-harf-e-āgahī na ho sakā

vo mujh meñ asl zaat kī tarah rahā magar kabhī

ye munkashif na ho sakā

ki is ḳhiyām-e-zāt meñ mire sivā ye kaun hai

ik ajnabī sā āshnā

ye mujh meñ kaun hai

ye mujh mein kaun hai

ki jab bhi gardish-e-lahu ne

mere jism ki hararaten

har ek rag-e-hayat mein utar din

to us ki KHud-kalamiyon ne

nind ki siyah chadaren sameT lin

samaaton ki rahguzar mein

us ki guftugu ke qafile ruke

to dasht-e-zindagi pe

abr ka ghilaf aa gaya

sukut-e-zindagi mein jaise inqalab aa gaya

main us se puchhta raha

ki kab talak ye marg-o-zist ki musibaten

firaq-o-wasl ki saubaten

mere wajud par rahengi KHema-zan

magar mere sawal par

ya meri arz-e-haal par

nuzul-e-harf-e-agahi na ho saka

wo mujh mein asl zat ki tarah raha magar kabhi

ye munkashif na ho saka

ki is KHiyam-e-zat mein mere siwa ye kaun hai

ek ajnabi sa aashna

ye mujh mein kaun hai