zakir sahab

jab un kā zikr hamārī zabāñ pe aatā hai

to jaise dil meñ koī ik diyā jalātā hai

vo jin kā ilm kī duniyā meñ bol baalā hai

jahān-e-ilm meñ phailā huā ujālā hai

batā.eñ kyā tumheñ zākir husain kaise the

vo phuul ban ke hamāre chaman meñ rahte the

chaman udaas hai vo zīnat-e-chaman hai kahāñ

is anjuman meñ vo ab sadr-e-anjuman hai kahāñ

sunā.ī detī nahīñ ab vo pur-asar-taqrīr

nazar se ab huī ojhal vo azm kī tasvīr

hamesha rahtā thā insāniyat kā paas unheñ

na mushkilāt meñ hotā kabhī hirās unheñ

moallimoñ ko vo dete the daras mehr-o-vafā

vo chāhte the madrasoñ meñ ḳhush-gavār fazā

vo chāhte the phaleñ phūleñ naunihāl-e-chaman

na.e shagūfoñ se ho pur-bahār ab gulshan

jab un ka zikr hamari zaban pe aata hai

to jaise dil mein koi ek diya jalata hai

wo jin ka ilm ki duniya mein bol baala hai

jahan-e-ilm mein phaila hua ujala hai

bataen kya tumhein zakir husain kaise the

wo phul ban ke hamare chaman mein rahte the

chaman udas hai wo zinat-e-chaman hai kahan

is anjuman mein wo ab sadr-e-anjuman hai kahan

sunai deti nahin ab wo pur-asar-taqrir

nazar se ab hui ojhal wo azm ki taswir

hamesha rahta tha insaniyat ka pas unhen

na mushkilat mein hota kabhi hiras unhen

moallimon ko wo dete the daras mehr-o-wafa

wo chahte the madrason mein KHush-gawar faza

wo chahte the phalen phulen naunihaal-e-chaman

nae shagufon se ho pur-bahaar ab gulshan