zaKHm

maiñ tum se kuchh na chhupā.ūñgā aur hai bhī kaun

jise maiñ jaan se baḌh kar aziiz rakhtā huuñ

tumheñ dikhā.ūñgā maiñ zindagī kā ek ek zaḳhm

maiñ tum se kuchh na chhupā.ūñgā vaqt aane do

bahut se zaḳhm diye haiñ mujhe zamāne ne

maiñ tum se kuchh na chhupā.ūñgā vaqt aane do

ye zaḳhm apne hī logoñ ke haiñ atā-karda

ye un ke zaḳhm haiñ jo umr bhar ke sāthī haiñ

ye un ke zaḳhm haiñ jo apnī aarzū ke liye

mirī umangoñ ke har phuul ko masal Daalā

ye un ke zaḳhm haiñ jo apnī tishnagī ke liye

mire laboñ ko sulagtā huā hī chhoḌ diyā

ye un ke zaḳhm haiñ jo apnī raushnī ke liye

mire charāġhoñ ko be-vaqt hī bujhā Daalā

ye un ke zaḳhm haiñ jo merī bhīgī palkoñ se

bahut se phuul chune dāman-e-ḳhushī ke liye

ye un ke zaḳhm haiñ jo mujh ko raah dikhlā kar

tamām umr bhaTakne ke vāste chhoḌā

ye un ke zaḳhm haiñ jo merā naam le le kar

hamesha merī mohabbat kā giit gaate rahe

mirī vafāoñ kā yuuñ bhī mazāq uḌāte rahe

main tum se kuchh na chhupaunga aur hai bhi kaun

jise main jaan se baDh kar aziz rakhta hun

tumhein dikhaunga main zindagi ka ek ek zaKHm

main tum se kuchh na chhupaunga waqt aane do

bahut se zaKHm diye hain mujhe zamane ne

main tum se kuchh na chhupaunga waqt aane do

ye zaKHm apne hi logon ke hain ata-karda

ye un ke zaKHm hain jo umr bhar ke sathi hain

ye un ke zaKHm hain jo apni aarzu ke liye

meri umangon ke har phul ko masal Dala

ye un ke zaKHm hain jo apni tishnagi ke liye

mere labon ko sulagta hua hi chhoD diya

ye un ke zaKHm hain jo apni raushni ke liye

mere charaghon ko be-waqt hi bujha Dala

ye un ke zaKHm hain jo meri bhigi palkon se

bahut se phul chune daman-e-KHushi ke liye

ye un ke zaKHm hain jo mujh ko rah dikhla kar

tamam umr bhaTakne ke waste chhoDa

ye un ke zaKHm hain jo mera nam le le kar

hamesha meri mohabbat ka git gate rahe

meri wafaon ka yun bhi mazaq uDate rahe