zamin aur suraj

batāte haiñ mire abbū ki gol hai duniyā

ḳhud apnī kiilī pe chakkar lagātī rahtī hai

jo hissa aatā hai sūraj ke sāmne us kā

vahāñ pe hotā hai din raushnī bhī rahtī hai

jo hissa dhartī kā sūraj ke sāmne na rahā

añdherā hotā hai us samt raat hotī hai

jahāñ ho din vahāñ hotā hai kārobār-e-hayāt

jahāñ ho raat vahāñ kā.enāt sotī hai

na sirf ye ki zamīñ ghūmtī hai mehvar par

to puurā kartī hai chaubīs ghanToñ meñ chakkar

kamāl ye hai ki sūraj ke gird ghuum ke bhī

ye puure saal meñ kartī hai ek kār-e-digar

isī nizām se mausam badaltā rahtā hai

kahīñ hai garmī to sardī kahīñ pe hotī hai

kahīñ bahār khilātī hai sabza-zāroñ meñ gul

kahīñ baras ke ghaTā motiyāñ pirotī hai

zamīñ ho chāñd ho taare hoñ yā ki sūraj ho

ḳhalā meñ tairte rahte haiñ saare sayyāre

sañbhāle rahtī hai ik dūsre ko un kī kashish

tavīl hai jo Dagar us pe chalte haiñ saare

natīja niklā yahī bāhamī ta’āvun par

hai inhisār hamāre nizām-e-shamsī kā

milā ke haath chalegā agar bashar 'mehdī'

to husn aur bhī nikhregā apnī dhartī kā

batate hain mere abbu ki gol hai duniya

KHud apni kili pe chakkar lagati rahti hai

jo hissa aata hai suraj ke samne us ka

wahan pe hota hai din raushni bhi rahti hai

jo hissa dharti ka suraj ke samne na raha

andhera hota hai us samt raat hoti hai

jahan ho din wahan hota hai karobar-e-hayat

jahan ho raat wahan kaenat soti hai

na sirf ye ki zamin ghumti hai mehwar par

to pura karti hai chaubis ghanTon mein chakkar

kamal ye hai ki suraj ke gird ghum ke bhi

ye pure sal mein karti hai ek kar-e-digar

isi nizam se mausam badalta rahta hai

kahin hai garmi to sardi kahin pe hoti hai

kahin bahaar khilati hai sabza-zaron mein gul

kahin baras ke ghaTa motiyan piroti hai

zamin ho chand ho tare hon ya ki suraj ho

KHala mein tairte rahte hain sare sayyare

sanbhaale rahti hai ek dusre ko un ki kashish

tawil hai jo Dagar us pe chalte hain sare

natija nikla yahi bahami ta’awun par

hai inhisar hamare nizam-e-shamsi ka

mila ke hath chalega agar bashar 'mehdi'

to husn aur bhi nikhrega apni dharti ka