zamin ka bojh

azal se irtiqā kī rahguzar meñ

hazāroñ qāfile haiñ jāda-paimā

abad kī manziloñ meñ chalte chalte

bahut se log kho kar rah ga.e haiñ

ġhubār-e-rāh ho kar rah ga.e haiñ

jinheñ sarmāya-e-irfāñ milā thā

jinheñ aql-e-junūñ-sāmāñ milī thī

vo apnī manziloñ kī saḳhtiyoñ ko

safar kī nā-sazā bad-baḳhtiyoñ ko

adā-e-tamkanat se pī ga.e haiñ

aur un ke azm-e-mustahkam ke sho.ale

fazāoñ meñ ujālā kar ga.e haiñ

magar kuchh log 'anjum' is jahāñ meñ

jinheñ zauq-e-jahāñ-bīnī milī thī

jinheñ idrāk-e-hastī bhī milā thā

vo apnī buzdilī se

qadam aage baḌhā kar Dar ga.e haiñ

zamīñ kā bojh the jo nañg-e-insāñ

vo sab jiine se pahle mar ga.e haiñ

azal se irtiqa ki rahguzar mein

hazaron qafile hain jada-paima

abad ki manzilon mein chalte chalte

bahut se log kho kar rah gae hain

ghubar-e-rah ho kar rah gae hain

jinhen sarmaya-e-irfan mila tha

jinhen aql-e-junun-saman mili thi

wo apni manzilon ki saKHtiyon ko

safar ki na-saza bad-baKHtiyon ko

ada-e-tamkanat se pi gae hain

aur un ke azm-e-mustahkam ke shoale

fazaon mein ujala kar gae hain

magar kuchh log 'anjum' is jahan mein

jinhen zauq-e-jahan-bini mili thi

jinhen idrak-e-hasti bhi mila tha

wo apni buzdili se

qadam aage baDha kar Dar gae hain

zamin ka bojh the jo nang-e-insan

wo sab jine se pahle mar gae hain