zard kali

mere āñgan meñ jo bele kā hasīñ paudā hai

us meñ do phuul haiñ aur pāñch suhānī kaliyāñ

ik kalī zard hai bīmār hai afsurda hai

un ko chhūtī huī lahrātī hai jab mauj-e-sahar

muskurā uThte haiñ lab raqs meñ aatī hai nazar

yaad aatā hī nahīñ mujh ko mirā zaḳhm-e-jigar

sochtā huuñ ki ye nik.hat hai to phir ġham kyā hai

phuul hañste haiñ to kyoñ sochūñ ki shabnam kyā hai

isī aalam meñ vo bīmār kalī kahtī hai

bāġhbāñ mujh ko bhī ik pyaar kā bosa de do

saaz huuñ laakh shikasta sahī naġhma de do

sham.a huuñ laakh fasurda sahī jalva de do

aur phir bele se ik shor-e-fuġhāñ uThtā hai

mere ḳhushbū-bhare āñgan se dhuāñ uThtā hai

raas phūloñ kā bhī sad-haif na andāz aayā

zindagī chhoḌ de pīchhā mirā maiñ baaz aayā

mere aangan mein jo bele ka hasin pauda hai

us mein do phul hain aur panch suhani kaliyan

ek kali zard hai bimar hai afsurda hai

un ko chhuti hui lahraati hai jab mauj-e-sahar

muskura uThte hain lab raqs mein aati hai nazar

yaad aata hi nahin mujh ko mera zaKHm-e-jigar

sochta hun ki ye nikhat hai to phir gham kya hai

phul hanste hain to kyon sochun ki shabnam kya hai

isi aalam mein wo bimar kali kahti hai

baghban mujh ko bhi ek pyar ka bosa de do

saz hun lakh shikasta sahi naghma de do

shama hun lakh fasurda sahi jalwa de do

aur phir bele se ek shor-e-fughan uThta hai

mere KHushbu-bhare aangan se dhuan uThta hai

ras phulon ka bhi sad-haif na andaz aaya

zindagi chhoD de pichha mera main baz aaya