zeyabetis ke mariz

vo marīzān-e-zeyabetis jo aa.e haiñ yahāñ

un meñ bachche bhī haiñ shāmil aur būḌhe aur javāñ

is zamāne meñ ki jab hai mulk meñ har shai girāñ

ye banāte haiñ shakar baḌhtī haiñ jis se talḳhiyāñ

ḳhuun kī nalyoñ meñ cholestrol baḌh jaa.e agar

''phūl kī pattī se kaT saktā hai hiire kā jigar''

ḳhuun meñ in ke shakar hai shukr karte haiñ magar

ye duā dete haiñ 'insulin' ko shaam o sahar

'carbohydrate' aa jaate haiñ jis shai meñ nazar

khāne piine meñ kiyā karte haiñ ye us se hazar

ye jo mīThe ḳhuun vaale haiñ inheñ ma.alūm hai

''pencriatic juice'' meñ se in ke kuchh ma.adūm hai

ye namak-ḳhvārān-e-millat jab kahīñ piite haiñ chaa.e

''āgahī dām-e-shunīdan jis qadar chāhe bichhā.e''

Dālte haiñ ye ''swētics'' is meñ chīnī kī bajā.e

jis ko apnī jaan piyārī ho shakar kas tarah khaa.e

ye haiñ vo farhād jo shīrīñ se apnī duur haiñ

hai zeyabetis vo baḌhiyā jis se ye majbūr haiñ

ye jo bachche haiñ zeyabetis ke ġham meñ mubtalā

yā ilāhī in kī gaaḌī umar kī aise chalā

in ke qaabū aa ke dab jaa.e maraz kī ye balā

bach rahegā ehtiyātoñ meñ agar rah kar palā

shart ye hai zindagī meñ nazm ho aur inzibāt

ehtiyāt aur ehtiyāt aur ehtiyāt aur ehtiyāt

ho zeyabetis jise us kī davā parhez hai

hai rafīq-e-zindagī ye dukh jo dard-āmez hai

is kā phir virse meñ milnā bhī ta.ajjub-ḳhez hai

ḳhāndānī qism kā dukh hai hazar-añgez hai

varna mīThā ḳhuuñ agar rag meñ ravāñ ho jā.egā

''dostī nādāñ kī hai, jī kā ziyāñ ho jā.egā''

wo marizan-e-zeyabetis jo aae hain yahan

un mein bachche bhi hain shamil aur buDhe aur jawan

is zamane mein ki jab hai mulk mein har shai giran

ye banate hain shakar baDhti hain jis se talKHiyan

KHun ki nalyon mein cholestrol baDh jae agar

phul ki patti se kaT sakta hai hire ka jigar

KHun mein in ke shakar hai shukr karte hain magar

ye dua dete hain 'insulin' ko sham o sahar

'carbohydrate' aa jate hain jis shai mein nazar

khane pine mein kiya karte hain ye us se hazar

ye jo miThe KHun wale hain inhen malum hai

pencriatic juice mein se in ke kuchh madum hai

ye namak-KHwaran-e-millat jab kahin pite hain chae

aagahi dam-e-shunidan jis qadar chahe bichhae

Dalte hain ye sweetics is mein chini ki bajae

jis ko apni jaan piyari ho shakar kas tarah khae

ye hain wo farhad jo shirin se apni dur hain

hai zeyabetis wo baDhiya jis se ye majbur hain

ye jo bachche hain zeyabetis ke gham mein mubtala

ya ilahi in ki gaDi umar ki aise chala

in ke qabu aa ke dab jae maraz ki ye bala

bach rahega ehtiyaton mein agar rah kar pala

shart ye hai zindagi mein nazm ho aur inzibaat

ehtiyat aur ehtiyat aur ehtiyat aur ehtiyat

ho zeyabetis jise us ki dawa parhez hai

hai rafiq-e-zindagi ye dukh jo dard-amez hai

is ka phir wirse mein milna bhi tajjub-KHez hai

KHandani qism ka dukh hai hazar-angez hai

warna miTha KHun agar rag mein rawan ho jaega

dosti nadan ki hai, ji ka ziyan ho jaega