zinda aadmi se kalam

kabhī vaqt kī saañs meñ

hoñT uljhā ke dekhe haiñ tum ne

ki is bad-gumāñ mausamoñ ke muġhannī kī tāneñ

nihāñ ḳhāna-e-dil meñ

gahrī ḳhamoshī kī haibat girātī chalī jā rahī haiñ

azal se abad tak bipharte hue

sail-e-be-mā.igī meñ kabhī

dil ukhaḌte hue shahr girte hue

dekh paa.e ho tum

kabhī bhīge bhīge se dīvār-o-dar meñ

ki bachpan kī galiyoñ makānoñ meñ

bārish kī āvāz se dil dahalte hue

kisī mushtarak ḳhauf kī āhaToñ se

dhaḌakte hue bām-o-dar aur ziine

musalsal havā aur bārish kī āvāz chaltī huī

kabhī muñh-añdhere kī taqdīs meñ

duur se aatī gaaḌī kī siiTī ko sunte hue

tum ne sochā hai un ke liye

jin ke qadmoñ meñ manzil

musalsal azaab aur ḳhvāboñ se ta.abīr tak duur hai

kabhī shaam kī sansanātī havā meñ

ThiThurtī ḳhamoshī kī sahmī sadā sun ke

darvāza kholā hai un ke liye

jin ke hāthoñ kī larzish meñ dastak nahīñ

mujhe pūchhnā hai

ki khulte hue phuul chaltī havā

aur guzre mah-o-sāl kī dastakoñ par

na ho sakne vāloñ pe aañsū bahā.e haiñ tum ne

ki maiñ

raat kī ek hichkī meñ Thahrī huī saañs huuñ

aur tumhārī ghanī niiñd ke bāzuoñ se

phisaltā huā lams huuñ

kabhi waqt ki sans mein

honT uljha ke dekhe hain tum ne

ki is bad-guman mausamon ke mughanni ki tanen

nihan KHana-e-dil mein

gahri KHamoshi ki haibat giraati chali ja rahi hain

azal se abad tak bipharte hue

sail-e-be-maigi mein kabhi

dil ukhaDte hue shahr girte hue

dekh pae ho tum

kabhi bhige bhige se diwar-o-dar mein

ki bachpan ki galiyon makanon mein

barish ki aawaz se dil dahalte hue

kisi mushtarak KHauf ki aahaTon se

dhaDakte hue baam-o-dar aur zine

musalsal hawa aur barish ki aawaz chalti hui

kabhi munh-andhere ki taqdis mein

dur se aati gaDi ki siTi ko sunte hue

tum ne socha hai un ke liye

jin ke qadmon mein manzil

musalsal azab aur KHwabon se tabir tak dur hai

kabhi sham ki sansanati hawa mein

ThiThurti KHamoshi ki sahmi sada sun ke

darwaza khola hai un ke liye

jin ke hathon ki larzish mein dastak nahin

mujhe puchhna hai

ki khulte hue phul chalti hawa

aur guzre mah-o-sal ki dastakon par

na ho sakne walon pe aansu bahae hain tum ne

ki main

raat ki ek hichki mein Thahri hui sans hun

aur tumhaari ghani nind ke bazuon se

phisalta hua lams hun