zindagi apna faisla KHud likhegi

ham apnī barahnagī chhupāte phirte haiñ

aisī hālat meñ ta.āruf kā falsafa

dīvāngī meñ baḌbaḌānā hotā hai

bikhrī chīzoñ ke ambār meñ

kis kis kā rutba yaad rakhte

ham ne marzī kī tartīb banā lī

ḳhushbū kā ehtimām kahāñ se karte

badbū hameñ zyāda pur-tapākī se milī

ham apne hī jismoñ ko chhū kar ḳhush ho jaane vaale

saḌāñd detī chīzoñ se safā.ī maañg rahe haiñ

hamāre gharoñ kī chhatoñ par be-āvāz bārish hotī hai

ham jhulaste kamroñ meñ

paanī ke ḳhvāb dekhne ke liye

apne bistaroñ se duur jā ke sote haiñ

hamārī āñkhoñ ke shīshoñ meñ niiñd nahīñ

maut aa ke apnā chehra dekhtī hai

ham vo ukhḌe rāste haiñ

jis ko gird ke pahre-dāroñ ne hamvār nahīñ hone diyā

hamārī tavīl sarguzisht meñ takrār hī takrār hai

hameñ sirf ek ruḳh vaale safhe par tahrīr kiyā gayā

jo apne pahle hisse se aa miltā hai

hum apni barahnagi chhupate phirte hain

aisi haalat mein taaruf ka falsafa

diwangi mein baDbaDana hota hai

bikhri chizon ke ambar mein

kis kis ka rutba yaad rakhte

hum ne marzi ki tartib bana li

KHushbu ka ehtimam kahan se karte

badbu hamein zyaada pur-tapaki se mili

hum apne hi jismon ko chhu kar KHush ho jaane wale

saDand deti chizon se safai mang rahe hain

hamare gharon ki chhaton par be-awaz barish hoti hai

hum jhulaste kamron mein

pani ke KHwab dekhne ke liye

apne bistaron se dur ja ke sote hain

hamari aankhon ke shishon mein nind nahin

maut aa ke apna chehra dekhti hai

hum wo ukhDe raste hain

jis ko gird ke pahre-daron ne hamwar nahin hone diya

hamari tawil sarguzisht mein takrar hi takrar hai

hamein sirf ek ruKH wale safhe par tahrir kiya gaya

jo apne pahle hisse se aa milta hai